Almaty - Qazaqstandaǵy Dúnıejúzilik qolóner keńesi (World Crafts Council) World Craft Sity – «Dúnıejúzilik qolóner qalasy» qurmetti mártebesin alǵan qala atandy. Bul sheshim megapolıstiń mádenı murany saqtaý, qolóner dástúrlerin damytý jáne kreatıvti ekonomıkany qoldaý isindegi eleýli úlesin moıyndaýdyń belgisi boldy, dep habarlaıdy Aqshamnews.kz tilshisi. Bul týraly Almaty qalasynyń Týrızm basqarmasy habarlady.
Sertıfıkatty tabystaý saltanaty 5 qazan kúni Almatyda ótken ALA CRAFT 2025 halyqaralyq festıvali aıasynda ótti. Festıválge Qazaqstannan, Azıadan, Eýropadan, Avstralıa men AQSH-tan kelgen 100-den astam sheber qatysty. Shara Ortalyq Azıadaǵy qolóner salasyndaǵy eń iri mádenı alańǵa aınaldy.
«Almatynyń World Craft City mártebesin alýy – qalamyz úshin mańyzdy jetistik. Bul ataq Almatynyń kreatıvti ındýstrıalar men mádenı týrızmniń ortalyǵy retindegi halyqaralyq bedelin arttyrady. Sondaı-aq ol qolóner dástúrlerin álemdik deńgeıde nasıhattaýǵa, bilim berý baǵdarlamalaryn jáne sheberlerge arnalǵan halyqaralyq rezıdensıalar júıesin damytýǵa, sondaı-aq qalanyń ekonomıkasyna yqpaldasqan turaqty qolóner ekojúıesin qalyptastyrýǵa múmkindik beredi», – dedi Almaty qalalyq Týrızm basqarmasynyń basshysy Ǵalıa Toqseıitova.
Dúnıejúzilik qolónershiler keńesiniń Azıa-Tynyq muhıty aımaǵy boıynsha prezıdenti Djýd van der Merveniń aıtýynsha, Almatynyń bul mártebeni ıelenýi halyqaralyq mádenı yntymaqtastyq pen shyǵarmashylyq ındýstrıalardyń damýyna jańa múmkindikter ashady.
Festıváldiń erekshe sáti – álemdik rekordtyń ornatylýy boldy: qazaqstandyq kúsh atasy, tórt dúrkin álem rekordshysy jáne Gınnestiń rekordtar kitabynyń ıegeri Sergeı Syrýlnıkov nebári bir mınýtta toǵyz at taǵasyn maıystyryp, aldyńǵy álemdik kórsetkishten úsh eseden astam asyp tústi. Bul jetistik resmı túrde Global Book of Records kitabynda tirkeldi.
Almaty Ortalyq Azıadaǵy týrısik jáne mádenı ortalyq retindegi bedelin nyǵaıta túsýde: tek 2025 jyldyń alǵashqy jarty jyldyǵynda qalaǵa 1,14 mıllıon týrıs kelip, onyń 323 myńy – sheteldik qonaqtar boldy.
World Craft City mártebesiniń berilýi men ALA CRAFT 2025 festıvaliniń ótkizilýi megapolıstiń kreatıvti ekonomıka men mádenı týrızmdi damytýdaǵy kóshbasshylyǵyn dáleldeıdi.