Qoryq aýmaǵyna kirýge tyıym salyndy.
Oǵan sebep - Almaty memlekettik tabıǵı qoryǵy aýmaǵynda bıiktigi 1,5 metr, uzyndyǵy 15 metrge deıin jetetin qar kóshkininiń júrýi. Memlekettik ınspektorlar joldardy qardan tazalaý jumystaryn júrgizýde, dep habarlaıdy Almaty-akshamy.kz QazAqparatqa silteme jasap.
«2023 jylǵy 24 aqpanda Almaty memlekettik tabıǵı qoryǵy Talǵar bólimshesiniń oń jáne sol Talǵar shatqalynyń boıymen qyzmet kordondaryna qatynasatyn órt qaýipsizdigi joldaryna birneshe jerden bıiktigi 1,5 metr eni 15 metr bolatyn qar kóshkini tústi. Memlekettik ınspektorlardyń kúshimen qardy ashý jumystary júrgizilýde. Osyǵan baılanysty qoryq aýmaǵyna bógde adamdardyń kirip-shyǵýyna tyıym salynady»,- delingen habarlamada.
Buǵan deıin qalalyq Tótenshe jaǵdaılar departamenti Úlken jáne Kishi Almaty ózenderinde qar kóshkini qaýpi saqtalatyny týraly eskertken edi.