Almaty Qoǵamdyq keńesiniń Qoǵamdyq damý komıteti «Alataý Aqparat» medıaholdınginiń jumysyn monıtorıńten ótkizdi. Qoǵamdyq keńes músheleri jýrnalıser men basqa qyzmetkerlerdiń eńbek jaǵdaılaryna erekshe nazar aýdardy, dep habarlaıdy aqshamnews.kz
Komıtet tóraǵasy Qaıyrjan Abdyhalyqov bastaǵan monıtorıń tobyna Erbolat Baıǵanın, Janna Isıngarına, Vıtalıı Koltochnık, Arman Qudabaı, Madıa Tórebaeva jáne Rýslan Zaharın kirdi. Sarapshylar holdıńtiń keńsesinde bolyp, redaksıa qyzmetkerlerimen kezdesti.
Kezdesý barysynda, ulttyq jáne memlekettik baǵdarlamalardy nasıhattaý, gazet oqyrmandary men saıt aýdıtorıasyn arttyrý, bilim berý ortalyqtary men ýnıversıtettermen yntymaqtastyq, medıaholdıngtiń strategıalyq josparlary men marketıńtik qadamdary sonymen qatar jýrnalıser men qyzmetkerlerdiń eńbek etý jaǵdaılary taldanyp, uıymnyń qarjylyq jáne uıymdastyrýshylyq máseleleri qarastyryldy.
Qoǵamdyq damý komıteti medıaholdıngtiń «Halyq únine qulaq asatyn memleket» tujyrymdamasyn jáne qoǵamdyq keńester týraly zańǵa sáıkes azamattyq qoǵammen ózara áreketin talqylady.
Redaksıa qyzmetkerleri óz jobalary men bolashaq josparlaryn tanystyryp, ınovasıalardy damytýǵa basymdyq berýdi maqsat etetinin aıtty. Monıtorıń barysynda medıaholdıngtiń damý kezeńderi kórsetilgen murajaıy men jańa podkast stýdıasy tanystyryldy. Bul stýdıa medıaholdıngtiń aýdıtorıamen baılanysyn nyǵaıtýǵa arnalǵan jańa kreatıvti ortalyq bolmaq.
Monıtorıń nátıjesinde medıaholdıngtiń qoǵam, aqparattyq keńistik jáne memlekettik organdar arasyndaǵy baılanysty nyǵaıtýdaǵy róli joǵary baǵalandy. Qoǵamdyq keńes músheleri «Alataý Aqparat» medıaholdınginiń damý múmkindikterine qoldaý bildirdi.