Almaty qalasynyń Medeý aýdanynda oqýshy ornynyń tapshylyǵyn tómendetý úshin 8 joba júzege asyrylýda. Bul týraly RSK brıfıńinde aýdan ákimi Erkebulan Orazalın málimdedi, dep habarlaıdy almaty-akshamy.kz
«Búginde mektep oryndarynyń tapshylyǵy 3 461 oryndy quraıdy. Jańa jobalar 5 myń jańa oryndy qamtamasyz etýge múmkindik beredi. Bul qosymsha qurylystar salý jáne seısmıkalyq kúsheıtý arqyly kúrdeli jóndeý. Tamyz aıynda №35 mektepke 300 oryndy jáne №99 mektepke 250 oryndy japsarlas 2-shi JSQ boıynsha saraptama qorytyndylary alyndy. Qurylys-montajdaý jumystaryn bastaý 2024 jyldyń 2 toqsanyna josparlanǵan», - dep atap ótti Erkebulan Orazalın.
Sondaı-aq, onyń aıtýynsha, tamyz aıynda №48 mektepti 250 oryndǵa keńeıtý men qaıta jańartý, al №131 mektepte seısmıkalyq kúsheıtýmen kúrdeli jóndeý jumysy aıaqtaldy. Al jeltoqsan aıynda aýdan ákimdigi №131 jáne №168 mektepterge bastaýysh synyptar úshin qosymsha qurylys salýǵa arnalǵan eki JSQ boıynsha árqaısysy 300 oryndy saraptama qorytyndysyn alady dep kútedi. Budan basqa, №33, 161 jáne 17 mektepterdi seısmıkalyq kúsheıte otyryp, qaıta jańartýǵa JSQ ázirlenýde.
«№33 mektep boıynsha tamyz aıynda saraptama alyndy, qurylys-montajdaý jumystarynyń bastalýy – 2024 jyldyń 1 toqsany. №161 jáne №17 mektepter boıynsha memlekettik saraptama nátıjelerin aqpan aıynda jáne 2024 jyldyń 2 toqsanynda qurylys-montajdaý jumystarynyń bastalýyn kútemiz. Sondaı-aq, Qulja traktiniń ońtústigindegi «Jaıly mektep» ulttyq jobasy aıasynda 2 myń oryndyq jańa mekteptiń qurylysy bastaldy. Al jeke ınvestorlardyń qarajaty esebinen shaǵyn aýdanda 1500 oryndy eki mektep salý josparlanǵan. «Dýmanda» 1200 oryndy jáne Halıýllın kóshesi, 140 meken jaıynda 300 oryndy. 3 jobany iske asyrý merzimi — 2024 jyl. Al 2024 jyldyń qańtar aıynda 260 oryndy «Ikigai School» jekemenshik mektebiniń sportzalynyń qurylysy aıaqtalady», - dedi Medeý aýdanynyń ákimi
Sonymen qatar, onyń aıtýynsha, Bógenbaı batyr kóshesi, 42 meken-jaıynda №29 mektep úshin 300 oryndy qosymsha qurylys salý úshin jer ýchaskesin satyp alý rásimderi júrgizilýde.
Ol Medeý aýdanynda 450 oryndy 9 jańa balabaqsha ashylyp, jyl sońyna deıin 1 balabaqsha ashylatynyn atap ótti. Sonymen qatar, №195 balabaqshany seısmıkalyq kúsheıte otyryp, kúrdeli jóndeýge JSQ ázirlendi.