Almatyda «Almaty – bizdiń ortaq úıimiz» naýqany bastaldy, onyń aıasynda qalanyń barlyq aýdanynda ruqsat etilmegen jarnama joıylady.
Áýezov aýdanynda kásipkerlikti jáne ónerkásipti damytý bólimi «Almaty - bizdiń ortaq úıimiz» ekonaýqany aıasynda ruqsat etilmegen jarnamany joıý máselesi boıynsha bıznes nysandaryna túsindirý jumystaryn júrgizdi. Ákimdik qyzmetkerleri 251 nysandy aralady, dep habarlaıdy Almaty-akshamy.kz.
Túrksib aýdanynda ruqsat etilmegen jarnamany joıý Jansúgirov, Bekmahanov, İle traktisi, Shemákın kóshelerinde júrgiziledi. Ádette, ruqsat etilmegen jarnama dámhanalar, dúkender jáne t.b. kásipkerlik nysandarynyń janynda ornatylady. Barlyǵy 200 nysan qamtyldy.
Alataý aýdanynda ruqsat etilmegen jarnamany joıý úshin 100-den astam adam, sondaı-aq 50-den astam tehnıka jumyldyryldy. Sonymen qatar, 3 brıgada aıaldamalardy boıaýmen jáne jýýmen aınalysady.
Jetisý aýdanynda Soltústik aınalma kóshesi, Raıymbek dańǵyly, Rysqulov dańǵyly boıynsha ruqsat etilmegen jarnamalardy joıý jumystary júrgizilýde. Shamamen 30-40 adam atsalysady.
Naýryzbaı aýdanynda Jandosov kóshesiniń boıynda kásip ıeleri 20-dan astam jarnamalyq bannerdi alyp tastady.
Barlyq aqparat almaty.kz saıty men Almaty ákimdiginiń áleýmettik jelilerindegi paraqshalarynda jarıalanady. Sondaı-aq, qaladaǵy banner, plakat jáne afıshalardaǵy arnaıy QR-kod arqyly veb-saıtqa kirýge bolady.
