Almatyda «Almaty – bizdiń ortaq úıimiz» naýqany aıasynda qala aýdandarynda oryndyqtar men qoqys jáshikteri syrlana bastady, al keı aýdanda qoqys jáshikterin ishinara aýystyrý kózdelgen. Barlyǵy 6438 oryndyq pen 12627 qoqys jáshigi boıalyp, 500-y aýystyrylady, dep habarlaıdy almaty-akshamy.kz.
Medeý aýdanynda oryndyqtar men qoqys jáshikterin 8 sáýirde kúni boıy syrlaý josparlanǵan. Esentaı ózeniniń jaǵasynda, Jambyl býlvarynda, Nazarbaev dańǵylynyń shyǵys jaǵyndaǵy skverde, Qabanbaı batyr men Bógenbaı batyr arasynda jáne «Drýjba» skverinde oryndyqtar men qoqys jáshikteri syrlanady. Barlyǵy 228 oryndyq pen 228 qoqys jáshigin boıaý josparlanyp otyr. Bul jumysqa 50 adam tartyldy.
Bostandyq aýdanynda eki apta boıy aýdan aýmaǵynda, kóshe boıynda, saıabaqtarda, skverlerde jáne t.b. jerlerdegi býlvarlarda ornalasqan 2 152 oryndyq pen 3 813 qoqys jáshigin syrlaý jumystaryn júrgizý josparlanǵan. Buǵan barlyǵy 12 brıgada, 53 jumysshy jumyldyryldy.
Almaly aýdanynda sáýir aıynyń sońyna deıin 100-ge jýyq adam men 9 birlik tehnıkany jumyldyryp, 4222 qoqys jáshigi men 1758 oryndyq syrlanady. Olar Gogol kóshesinde, Maqataev atyndaǵy skverde jáne Severnyı skverinde.
Túrksib aýdanynda aldaǵy 10 kúnde Seıfýllın jáne Súıinbaı dańǵyldary, Buqtyrma kóshesi, Maılın kóshesi boıyndaǵy 100 oryndyq pen 100 qoqys jáshigin, sondaı-aq Seıfýllın atyndaǵy skver men Seıfýllın atyndaǵy saıabaqta syrlaý jumystaryn júrgizý josparlanǵan. Buǵan 4 jumysshy brıgada, barlyǵy 40 adam, sondaı-aq 6 tehnıka jumyldyrylady.
Naýryzbaı aýdanynda 750 kóshedegi jáne aıaldamaǵy qoqys jáshigin syrlaý josparlanýda. Bul jumys naýryz aıynyń sońynda bastaldy. Qazirgi ýaqytta olar 60% aıaqtaldy. Sonymen qatar, 500 jańa qoqys jáshigin satyp alýǵa ótinim berildi. Jandosov, Dáýletkereı, Karernaıa, Bekeshev, Kenesary han, Nádirov, Áshimov kóshelerinde, sondaı-aq Alataý dańǵylynda sáýir aıynyń sońynda aýystyrý jáne montajdaý jumystaryn bastaý josparlanǵan.
Jetisý aýdanynda oryndyqtar men qoqys jáshigin syrlaý jumystary bastaldy, sáýir aıynyń sońyna deıin barlyǵy 3514 qoqys jáshigi men 2200 oryndyqty 30 adam syrlaıdy. Súıinbaı, Rysqulov, Raıymbek dańǵyldarynda, sondaı-aq Soltústik aınalma jol boıyndaǵy nysandar boıalady.