23 maýsym kúni búkil álem Halyqaralyq Olımpıada kúnin atap ótedi.
Osy oraıda, Olympic.kz el óńirlerindegi sport qaharmandary týraly materıaldar tizbegin usyndy, dep habarlaıdy Almaty-akshamy.kz.
Almaty qalasy otandyq sporttyń órkendeýine zor úles qosty. Alataý baýraıyndaǵy sportshylar álemdik jarystar men Olımpıada oıyndarynda tuǵyrdan kórindi.
Jeńil atlet Olga Shıshıgına 2000 jylǵy Sıdneı Olımpıadasynda top jardy. Ol 100 metrge kedergiler arqyly júgirýden chempıon atandy. Sondaı-aq, Shıshıgına álem chempıonatynyń kúmis jáne qola júldegeri, Azıa chempıony, Azıa oıyndarynyń eki dúrkin chempıony, jabyq ǵımarattaǵy álem chempıonatynyń jeńimpazy.
Almatydan shyqqan taǵy bir Olımpıada chempıony – Dmıtrıı Balandın. Ol 2016 jylǵy Rıo Olımpıadasynda 200 metrge bras ádisimen júzýden chempıon atandy. Odan bólek, Balandın Azıa oıyndarynyń úsh dúrkin chempıony, Ýnıversıada jeńimpazy jáne Azıa oıyndarynyń úsh dúrkin qola júldegeri.
Mánerlep syrǵanaýdan Qazaqstanǵa Olımpıada men álem chempıonatynyń tuńǵysh ári tarıhı júldesin syılaǵan Denıs Ten Almaty qalasynyń týmasy. Denıs mánerlep syrǵanaýdan Sochı Olımpıadasynyń qola júldegeri, álem chempıonattarynyń kúmis jáne qola júldegeri, Azıa oıyndarynyń chempıony, Tórt qurlyq chempıonatynyń jáne qysqy Ýnıversıadanyń jeńimpazy. Sportshy 2018 jyly buzaqylar qolynan qaza tapty.
Mergen Sergeı Beláev Almatynyń ataǵyn alysqa aparǵan sportshy. Ol nysana kózdeýden Atlanta Olımpıadasynyń eki dúrkin kúmis júldegeri. Azıa oıyndarynan jalpy esebi 4 altyn, 2 kúmis, 4 qola ıelengen.
Nysana kózdeý sportynyń taǵy bir jarqyn ókili Vladımır Vohmánın Almatynyń atynan álemdik jarystarǵa qatysty. Ol Barselona jáne Atlanta Olımpıadalarynyń qola júldegeri, eki dúrkin álem, eki dúrkin Eýropa chempıony. Azıa chempıonatynyń altyn júldegeri. Jazǵy Azıa oıyndarynda 1 altyn, 1 kúmis jáne 2 qola medal enshilegen.
Bıatlonnan Vankýver Olımpıadasynyń kúmis júldegeri Elena Hrýstaleva men erkin kúresten eki dúrkin álem chempıony, Olımpıadanyń qola júldegeri Mhıtar Manýkán da Almatynyń atynan synǵa tústi.
Shańǵymen tuǵyrdan sekirýden Lıllehamerdegi Olımpıada oıyndarynyń qatysýshysy, búginde bapkerlik qyzmetti qolǵa alǵan Qaırat Bıekenov ta Almaty óńirinen. Onyń jetekshiligimen Qazaqstan 2011 jylǵy Azıa oıyndarynda 1 altyn, 1 kúmis jáne 2 qola medal jeńip aldy. Sondaı-aq, Ilá Mızernyh jasóspirimder Olımpıadasynda top jardy.
