Almaty qalasynyń ákimi E.Dosaev qańtar tragedıasy kezinde japa shekken kásipkerlermen jáne bıznes ókilderimen kezdesti. Jıynda qala basshysy bıznes ıegerlerimen shyǵyndy óteýge jumsalatyn tólemderdi jedeldetý máselelerin talqylady, dep habarlaıdy Almaty-akshamy.kz
Buǵan deıin aımaqtyq komısıa shyǵyndy óteý boıynsha mehanızmde kinárat baryn anyqtap, óz tarapynan naqty usynystar engizgen bolatyn. Ákimdiktiń usynystary 2022 jylǵy 1 aqpanda QR Ulttyq ekonomıka mınıstrligimen jedel túrde kelisilip, úkimettik komısıa deńgeıinde maquldandy. Búgin Shyǵyndy óteý erejesine tıisti ózgerister men tolyqtyrýlar engiziledi.
Negizgi ońaltý sharalary taýarlyq-materıaldyq qundylyqtarǵa kelgen múliktik zalalǵa qatysty. Endi 5 mln teńgege deıingi eń joǵary tólem somasymen jeńildetilgen mehanızm boıynsha zaqymdalǵan jyljymaly ári jyljymaıtyn múlikke, qalpyna keltirýge kelmeıtin jáne joǵalǵan jabdyqtarǵa da shyǵyndy óteý mehanızmi qarastyrylyp otyr. Bul óz kezeginde zardap shekken bıznes sýbektilerin keńinen qamtýǵa múmkindik beredi. Sonymen qatar memlekettik búdjet qarajatynan bólek qorlardyń jeke aqshalarynan da tólem júrgizý máselesi qaralyp jatyr. Iaǵnı, ótemaqy tóleý prosesin jetildirý jolyndaǵy izgi jumystar jalǵasa beredi.
Eske sala keteıik, zardap shekken kásipkerler komýnaldyq shyǵyndardy tóleýden 3 aıǵa, al qaladaǵy komýnaldyq menshikti jalǵa alýshylar 6 aıǵa jalǵa alý tóleminen bosatylady.
Sonymen qatar, «Almaty Bıznes-2025» qalalyq baǵdarlama boıynsha, aınalymdaǵy qarajatyn eselep alý úshin kásipkerlerge kepil usyný arqyly 10 mln teńgege deıin jyldyq 2 paıyzben 12 aıǵa nemese «Almaty» AÓK ishinara kepildigimen jeńildetilgen nesıe beriledi. «Almaty Fınans» JSHS men «MFO Almaty» JSHS zardap shekken kásipkerlerge negizgi qaryzdy óteý merzimin uzartady, aıyppuldar men ósimpuldardy 180 kúnge deıin shegeredi.