Bilim salasy - nazarda
Y.Altynsarın atyndaǵy №159 gımnazıada QR Parlamenti Májilisiniń depýtaty Juldyz Súleımenova, Medeý aýdanynyń ákimi Áset Masabaev, Abaı atyndaǵy QazUPÝ rektory Darhan Bilálov jáne bilim basqarmasynyń ókilderi qala mektepteriniń dırektorlarymen kezdesý ótkizdi, dep habarlaıdy Almaty-akshamy.kz
J.Súleımenova men A.Masabaev Parlamenttiń zań shyǵarý qyzmeti jáne QR Prezıdentiniń depýtattyq korpýsqa eldegi bilim berýge qatysty tapsyrmalary týraly qysqasha baıandady. Kezdesý barysynda pedagogıkalyq kadrlardyń jetispeýshiligi, ınklúzıvti bilim berý máseleleri, muǵalimderdiń kásibı deńgeıin arttyrý, oqýlyqtardyń sapasy, qala men aýyl arasyndaǵy bilim berý salasyndaǵy alshaqtyqty joıý týraly ózekti máseleler talqylandy.
Rektor Darhan Bilálov mektep dırektorlaryna bilim salasyn damytýǵa qosqan úlesteri, sondaı-aq Abaı ýnıversıtetiniń stýdentteri men túlekteriniń biliktiligin arttyryp, olardy jumysqa ornalastyrýǵa qolǵabys etkenderi úshin alǵysyn bildirdi. QR BǴM pedagogıkalyq bilim berý salasynda kelesi ózekti máselelerge asa nazar bóletini atap ótildi, olar: kadr tapshylyǵy, qalalyq jáne aýyldyq mektepter deńgeıindegi alshaqtyq, pedagogtardyń mártebesi men olardyń biliktiligin arttyrý. Ol Abai University-ne júktelgen mindetterdiń biri – naqty bilim berý baǵdarlamalaryn ázirleýdiń mańyzdylyǵyn alǵa tartty. Onyń aıtýynsha, bul jumys úsh negizgi baǵyt boıynsha júzege asyrylýda: ınovasıalylyq, praktıkaǵa baǵdarlaný jáne belsendi qatysý, sondaı-aq, olardyń árqaısysyna jeke toqtalyp ótti.
Rektor mekteptermen baılanysty nyǵaıtý jónindegi josparlarymen bólisti. Máselen, «Ýnıversıtet - mektep» jobasy taraptardyń tikeleı (mektep muǵalimderin sapaly daıarlaý) jáne janama (bilim deńgeıi joǵary mektep talapkerlerin daıarlaý) ózara baılanysyn keńeıtýge nazar aýdarylatyn bolady. Bul baǵyttaǵy jumystar Abai University tájirıbesinde joǵary kásibı jáne tıimdi menedjerlerdiń, talantty kóshbasshy-basshylardyń kadrlyq rezervin qalyptastyrý, dýaldy jáne ınklúzıvti bilim berýdi damytýdy qamtıdy.
Joǵary oqý ornynyń qatysýy Almaty qalasy men jalpy elimizdiń bilim berý salasyndaǵy máselelerdi sheshýge baǵyttalǵan. Elimizdiń mektepterin tabysty jas ustazdarmen qamtamasyz etý maqsatynda ýnıversıtet álemniń kóptegen ýnıversıtetterinde qoldanylyp júrgen jańa «Honors College» jobasyn ázirleýde. Jobanyń maqsaty – pedagogıkalyq mamandyqtar boıynsha bilim alýshy stýdentterge qajetti quzyrettilikter, tereń bilim men daǵdylar berý. Sondaı-aq, rektor bilim berý sapasyn arttyrý jáne joǵary kásibı muǵalimderdi daıarlaýdy jaqsartý boıynsha qyzyqty usynystarymen bólisti.
Kezdesý sońynda depýtat Juldyz Súleımenova pikir almasý men usynystardyń óte paıdaly ekenin jáne alǵa qoıylǵan máselelerdi sheshýge bar kúshin salatynyn atap ótti.