AITV-ǵa ózin ózi testileý engizilgen eki jylda 6 myńnan astam almatylyq osy qyzmetti qoldanyp, ózderiniń AITV-mártebesin bildi, dep habarlaıdy aqshamnews.kz.
AITV-ǵa onlaın túrde ózin-ózi testileý, ásirese halyqtyń negizgi toptary (erkektermen jynystyq qatynastaǵy erkekter, ıneksıalyq esirtkini tutynatyn adamdar, transgenderlik adamdar) arasynda testileýmen qamtýdy keńeıtýdiń tıimdi quraly bolyp tabylady.
«Testter qoldaný úshin qarapaıym jáne kúrdeli manıpýlásıalardy qajet etpeıdi, sonymen birge olardyń sezimtaldyǵy joǵary jáne aıtarlyqtaı dál nátıje beredi», - dep Almaty qalasy QDB «JITS aldyn alý jáne oǵan qarsy kúres ortalyǵynyń» dırektory Marat Tókeev túsindiredi.
Arnaıy onlaın servısi arqyly testterge tegin jáne jasyryn túrde tapsyrys berýge bolady, sondaı-aq, testter Almaty JITS ortalyǵynda jáne ÚEU da qoljetimdi. Suraqtar týyndaǵan jaǵdaıda klıentterge qoldaý kórsetý jáne keńes berý qyzmeti bar. Eger test oń nátıje berse - JITS ortalyǵynyń mamandandyrylǵan zerthanasynda qosymsha tekserýden mindetti túrde ótý qajet.
Ózin-ózi testileý - bul juqtyrý qaýpi bar kez-kelgen adam paıdalana alatyn densaýlyqqa qatysty taǵy bir quqyq. AITV-ǵa qarsy is-qımyldaǵy jetistikter adam quqyqtaryn qorǵaý jáne densaýlyq saqtaý júıesin nyǵaıtý salasyndaǵy progrespen tyǵyz baılanysty.
20 qarashadan 1 jeltoqsanǵa deıin (Dúnıejúzilik JITS-ke qarsy kúres kúni) Almatyda «Durys joldy – adam quqyqtarynyń jolyn tańdańyz» IýNEIDS uranymen naýqan ótedi. Ár adamnyń quqyqtaryn saqtaý AITV-ǵa tıimdi tótep berýdiń negizi bolyp tabylady. Bul Dúnıejúzilik JITS-ke qarsy kúres kúni - árbir adamnyń quqyǵyn qorǵaý arqyly árbir adamnyń densaýlyǵyn qorǵaýǵa shaqyrý bolyp esepteledi.
Búgingi tańda, Qazaqstanda AITV-men ómir súretin adamdar antıretrovırýstyq terapıany tegin alýda. Almatyda janasýǵa deıingi profılaktıka qyzmeti (JDP) júzege asyrylady. Dostyq kabınetterinde halyqtyń negizgi toptaryna jatatyn 728 adam DDU-nyń nusqaýlaryn sáıkes JDP-ny alyp jatyr. Júkti áıelder AITV-ǵa tekserýden eki ret óte alady, tekserý oń nátıje bergende emdeýdi ýaqytyly bastap, deni saý balany jaryqqa ákele alady.
Naýqan kúnderi - 1 jeltoqsanǵa qaraı Almatyda AITV-nyń aldyn alý, AITV-ǵa shaldyqqan adamdarǵa stıgma men kemsitýshilikke jol bermeý týraly bilimdi nasıhattaý boıynsha aksıalar, dóńgelek ústelder, fleshmobtar jáne basqa da is-sharalar ótedi. Almaty «Qaırat» fýtzal klýbynyń jankúıerleri, bıznes-qurylymdardyń qyzmetkerleri men bilimgerler úshin ekspress- testileý aksıalary josparlanýda. «Almaty- 1» temirjol vokzaly men halyqaralyq áýejaıdyń jolaýshylary AITV-nyń aldyn alý týraly beınerolıkterdi kóre alady. AITV – men ómir súretin adamdar úshin dermatolog, mammolog, ftızıatr, onkolog tárizdi arnaıy mamandardyń keńesteri uıymdastyrylady. JITS-tiń aldyn alý jáne oǵan qarsy kúres ortalyǵynda halyq úshin «Ashyq esik kúni» ótedi. Árbir nıet bildirýshi mamandardan keńes alyp, AITV-ǵa tekserýden óte alady.