Maýsym aıynda elimizde 2 800-ge jýyq altyn quıma satylǵan.
2023 jyldyń maýsym aıynda ekinshi deńgeıli bankter men jekelegen aıyrbastaý pýnkterinde jalpy salmaǵy 123,4 keli 2 791 altyn quıma satyldy, dep habarlaıdy Almaty-akshamy.kz
Halyqqa tazartylǵan altyn quımalardy satý jáne satyp alý baǵdarlamasyn Ulttyq Bank 2017 jyly iske qosqan bolatyn.
Baǵdarlama qolǵa alynǵaly jalpy salmaǵy 4,5 tonna 132 396 altyn quıma satyldy.
Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ıe túri – 10 gramdyq altyn quıma.
Jalpy satylǵan quımalar arasynda onyń úlesi 26% – 34 526 dana. Odan keıin 5 gramdyq altyn quıma – 30 034 dana (23%), 100 gramdyq quıma – 27 626 dana (21%), 20 gramdyq quıma - 24 327 dana (18%), jáne 50 gramdyq quıma – 15 883 dana (12%). 2023 jylǵy maýsymda altyn quımalar myna óńirlerde eń kóp satylǵan: Almaty (1 404 dana, 50%), Shymkent (627 dana, 22%) jáne Astana (168 dana, 6%).
Altyn quımalar senimdi ınvestısıa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.
Baǵdarlama bastalǵannan beri ekinshi deńgeıli bankter men jekelegen banktik emes pýnkter jalpy salmaǵy 599,9 keli 22 848 altyn quımany keri satyp alǵan, bul – jalpy satylǵan altyn quımalardyń 17%-y. Olar keri satyp alǵan altyn quımalardyń barlyǵy derlik Ulttyq Banktiń fılıaldary arqyly halyqqa satylady.
«Árbir quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorapqa salynyp shyǵady, sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap, sondaı-aq sapa sertıfıkaty bolyp sanalady. Sondyqtan, altyn quımany uqypty saqtap, qorabyn búldirmeýge keńes beremiz», delingen habarlamada.