Almatyda erekshe qajettilikteri bar adamdar teatr ónerin tegin meńgere alady. «Alataý» dástúrli óner teatry múmkindigi shekteýli jandarǵa arnalǵan 10 ınklúzıvti úıirme usynýda. Onda qatysýshylar bı, án aıtý, ym tilinde án oryndaý, kloýnada, estý qabileti buzylǵan, ym-tilin meńgergen jandarǵa arnalǵan daktılologıa sabaqtaryna qatysa alady. Bul týraly Almaty qalasy Óńirlik komýnıkasıalar qyzmetinde ótken baspasóz konferensıasynda «Alataý» dástúrli óner teatrynyń dırektory Maqsat Nuralıev málimdedi, dep habarlaıdy aqshamnews.kz
Sonymen qatar, ol joǵary nátıjeler kórsetken qatysýshylar shyǵarmashylyq ujym quramyna enip, almatylyq teatr sahnasynda óner kórsetýge, sondaı-aq halyqaralyq baıqaýlarǵa qatysyp, óz talantyn álemdik deńgeıde tanytýǵa múmkindik alatynyn da atap ótti.
«Sabaqtar aptasyna 3 ret, 2 saǵattan ótedi, olardy teatr ártisteri men zaǵıp jáne estý qabileti nashar jandar qaýymdastyǵynyń jetekshileri júrgizedi. Bizdiń stýdıa-úıirmelerimizde shamamen 200 adam bilim alady. Sonymen qatar, Almaty qalasy Mádenıet basqarmasynyń qoldaýymen 130 is-shara ótkizdik. Olardyń qatarynda erekshe qajettilikteri bar jandarǵa arnalǵan halyqaralyq festıválder men baıqaýlar, qaıyrymdylyq konsertteri, dárister men mádenıet qaıratkerlerimen kezdesýler bar. Biz ınklúzıvti orta qalyptastyrýǵa umtylamyz, onda óner adamdar arasyndaǵy shynaıy baılanys kópirine aınalady, al bizdiń ártister – rýh myqtylyǵy men sheksiz múmkindikterdiń aıqyn úlgisi. Búginde bizde Italıa, Túrkıa, Qyrǵyzstan, Tájikstan jáne Malaızıada ótken halyqaralyq baıqaýlardyń jeńimpazdary men laýreattary bar. Bul jobalarǵa bizdiń ártister ákimdiktiń qoldaýymen qatysty», – dedi Maqsat Nuralıev.
Atap ótetin jaıt, «Alataý» dástúrli óner teatrynda kórý jáne estý qabileti buzylǵan jandar jumys isteıtin «Kórý jáne estý qabileti shekteýli jandarǵa arnalǵan mádenı demalysty uıymdastyrý bólimi» tabysty qyzmet etýde.