Bul týraly qalalyq máslıhattyń 27-sessıasynda belgili boldy
Almatyda oqýshylardy tasymaldaýǵa arnalǵan 100 shaqty jańa mektep avtobýsy satylyp alynady. Muǵalimder úshin de jaqsy jańalyq – olardyń kúndelikti oqý júktemesi 18 saǵattan 16 saǵatqa deıin qysqarady. Bul týraly qalalyq máslıhattyń 27-sessıasynda belgili boldy, dep habarlaıdy Almaty-akshamy.kz Almaty.tv-ge silteme jasap.
Búgin depýtattar aldaǵy jyldaǵy búdjetti naqtylaýǵa jınaldy. Málimetterge sáıkes, barlyq salany damytýǵa jalpy sommasy 105 mlrd teńgeden astam qarjy bólinedi. Onyń 37 paıyzy basqa jobalardyń ıgerilmegen qarjysy eken. Memlekettik qaryzdy óteýge qyryq mıllıardqa jýyq teńge jumsalady.
«Memlekettik qaryzdy merziminen buryn óteý aldaǵy ýaqytta syıaqy túrindegi 2,1 mlrd teńge búdjet qarajatyn únemdeýge múmkindik beredi. Bul qarajat áleýmettik mańyzy bar sharalardy qoldaýǵa jumsalady. Búdjettegi basym baǵyttaǵy jobalardy qoldaý úshin jergilikti búdjetti 63,8 mlrd teńgege ulǵaıtý kózdelgen. Sondaı-aq memlekettik satyp alýdan únemdeý esebinen qamtamasyz etiledi», – dedi Almaty qalasy ákiminiń orynbasary Asqar Ámrın.
Sondaı-aq, 4 mıllıard teńge mekteptegi ustazdardyń jalaqysyn kóterýge jumsalady. Al taǵy2,5 mıllıard teńge halyqty áleýmettik qoldaýǵa baǵyttalady. Oǵan qosa, alyp shahardaǵy balalarǵa arnalǵan jedel járdem kóligindegi operasıalyq bloktyń qurylysy jalǵasady. Ol úshin 1,5 mıllıard teńge bólinbek. Kelesi jyly 2 myń zeınetker úshin saýyqtyrý jyly bolmaq.
«Jalpy densaýlyq saqtaý salasyna 1,8 mlrd teńge bólinedi. Onyń ishinde 346 múmkindigi shekteýli jannyń kómekshilerine 183,1 mln.teńge bólý josparlanyp otyr», – dedi qalalyq qarjy basqarmasy basshysynyń mindetin atqarýshy Altynaı Tóleýtaeva.