Almaty ákimi Erbolat Dosaevtyń ókimimen QR Prezıdenti Ákimshiliginiń jáne Almaty qalasy máslıhatynyń kelisimi boıynsha Medeý aýdanynyń ákimi bolyp Erkebulan Nurlanuly Orazalın taǵaıyndaldy, dep habarlaıdy Almaty-akshamy.kz.
"Onyń basshylyǵymen Kásipkerlik jáne ınvestısıalar basqarmasy qalamyzdaǵy shaǵyn jáne orta bıznesti qalpyna keltirý boıynsha úlken jumys júrgizdi. Atalǵan tıimdi jumystyń arqasynda Memleket basshysynyń zardap shekken SHOB sýbektilerine keltirilgen zalaldy óteý jónindegi tapsyrmasy oryndaldy. Jalpy, zardap shekken kásipkerlerdiń 97% óz qyzmetin qalpyna keltirdi. Aǵymdaǵy jyldyń 20 mamyrynda quny 14 082 240 817 teńge bolatyn 1 568 ótinim maquldandy. Osy kúrdeli kezeńde Erkebulan Orazalın ózin jaýapty jáne bilikti maman retinde ári joǵary uıymdastyrýshylyq qabileti men iskerlik qasıetterin kórsetti", – dedi Almaty ákimi Erbolat Dosaev Medeý aýdanynyń jańa ákimin tanystyrý kezinde.
Erkebulan Orazalın eńbek jolyn 2002 jyly Almaty qalasy Aqparattyq-taldaý ortalyǵy aqparattyq-kommýnıkatıvtik bóliminiń sarapshysy qyzmetinen bastady.
2005-2007 jyldary Qazaqstan Respýblıkasy Tuńǵysh Prezıdenti Qory janyndaǵy Álemdik ekonomıka jáne saıasat ınstıtýtynyń sarapshysy bolyp jumys istedi.
2010-2012 jyldary Almaty qalasynyń Óńirlik damý áleýmettik-kásipkerlik korporasıasynyń ınvestısıalar jónindegi departamentiniń dırektory boldy.
2012-2016 jyldar aralyǵynda Almaty qalasy Tabıǵı resýrstar jáne tabıǵat paıdalanýdy retteý basqarmasy bastyǵynyń orynbasary, basshysy qyzmetin atqardy.
2016-2019 jyldary Almaty qalasy Áýezov aýdany ákiminiń orynbasary bolyp jumys istedi, áleýmettik sala jáne kásipkerlik máselelerine jetekshilik jasady.
2019 jyldan bastap Almaty qalasy Kásipkerlik jáne ınvestısıalar basqarmasynyń basshysy qyzmetin atqardy.