Qaladaǵy bir qyzmetshi departamentke issapar shyǵyndarynyń ótelmeýi týraly shaǵymmen júgindi. Atalǵan shaǵym boıynsha departament memlekettik eńbek ınspektoryn tarta otyryp, tekserý júrgizdi. Aıta ketý kerek, tekserý aǵymdaǵy jyldyń maýsym aıynan bastap qoldanysqa engizilgen memlekettik qyzmet salasyndaǵy zańnamanyń saqtalýyn baqylaýdyń jańa tártibi boıynsha júrgizildi, dep habarlaıdy aqshamnews.kz.
Tekserý barysynda qoldanystaǵy zańnamada belgilengen memlekettik qyzmetshiniń quqyqtarynyń óreskel buzylǵany anyqtaldy. 40 kúnge basqa qalaǵa issaparǵa jiberilgen qyzmetkerge jol júrý jáne turǵyn úı jaldaý shyǵyndary tólenbegen. Al Qazaqstan Respýblıkasynyń «Memlekettik qyzmet týraly» Zańynyń 57-babyna sáıkes, memlekettik qyzmetshilerge qyzmettik issaparlar shyǵyndary, onyń ishinde sheteldik issaparlar shyǵyndary da Qazaqstan Respýblıkasy Úkimeti aıqyndaıtyn tártippen óteledi. Memlekettik qyzmetshilerge zańnamada kózdelgen kepildikter jáne issaparda bolǵan ýaqytqa táýliktik tólemder, barý jáne qaıtý jol júrý shyǵyndary, turǵyn úı jaldaý shyǵyndaryn alý quqyǵy qoldanylady.
Júrgizilgen tekserý nátıjesinde departament anyqtalǵan zań buzýshylyqtardy joıý jáne memlekettik qyzmetshiniń buzylǵan quqyqtary men kepildikterin qalpyna keltirý týraly usynys engizdi. Nátıjesinde, usynys qaralyp, memlekettik qyzmetshiniń quqyqtary qalpyna keltirilip, issapar shyǵyndary 745 784 teńge kóleminde tólendi.
Qyzmetshilerdiń quqyqtaryn qorǵaý boıynsha osyndaı mysaldar kóp. Departament aldaǵy ýaqytta da memlekettik qyzmetshilerdiń quqyqtaryn qorǵaý jáne qalpyna keltirý baǵytyndaǵy jumysyn jalǵastyrady.
Almaty qalasy boıynsha QR Memlekettik qyzmet isteri agenttiginiń departamentiniń bas mamany — Laýra Nurgeldiqyzy Naýqanbaı