Almaty qalalyq polısıa departamenti málimetinshe, jol-kólik oqıǵasyn tergeý barysynda qyzmetkerler velosıpedshi qyzdy qaǵyp ketti delingen Toyota Solaris avtokóliginiń júrgizýshisin tapqan.
Ol oqıǵa ornyna polısıa qyzmetkerleri men dárigerler kelgenin aıtty.
Kóliktiń júrgizýshisi Dostyq dańǵylymen ońtústikke qaraı kele jatyp, keri burylǵan.
Sol kezde soltústikke qaraı kele jatqan velosıpedshi kólikke soǵylmaý úshin tejegishti basyp, qulap qalǵan, dep habarlaıdy Almaty-akshamy.kz QazAqparatqa silteme jasap.
Osy sátti baqylaý kamerasynyń beınejazbasynan anyq kórýge bolady.
«Burylyp úlgergen kólik ıesi artqy aınadan qyzdyń qulap qalǵanyn kóredi. Bul jerde toqtaýǵa tyıym salynǵandyqtan basqa kóshege kóligin qaldyryp, oqıǵa ornyna jaıaý barǵan. Ol birden 102, 103 nómirlerine habarlaǵan. Polısıanyń kelgenin kútti. Polıseıler velosıped pen avtokólik arasynda eshqandaı qaqtyǵys bolmaǵanyn anyqtady. Sol sebepti jol apaty tirkelmedi. Dárigerler qyzdy aýrýhanaǵa alyp ketti. Qazir qyzdy ota jasaýǵa daıyndap jatyr, sebebi, onyń tisteri synǵan, jaq súıegi jaraqattanǵan», - dep habarlady polısıanyń baspasóz qyzmeti.
Sondaı-aq vedomstvo kóshede turǵan polısıa kóliginiń oqıǵaǵa esh qatysy joq ekenin habarlady.
Tártip saqshylary aqparatty jan-jaqty teksergen soń ǵana qorytyndy shyǵarýǵa, al BAQ ókilderin jalǵan aqparat taratpaýǵa shaqyrady.
Eske salaıyq, keshe áleýmettik jelide kólik qaqqan qyzdyń vıdeosy shyqty.