Almatyda turmystyq qatynastar salasyndaǵy qylmystyq ahýaldy jaqsartý jáne qylmystyń aldyn alý maqsatynda “Turmys”, “Turmystyq zorlyq-zombylyqqa jol joq”, “Baqytty otbasy” syndy maqsatty profılaktıkalyq is-sharalary ótkizilýde.
Jyl basynan beri otbasy-turmystyq qatynastar salasynda áıelderge qatysty qylmys tirkelgen joq. Otbasy-turmystyq qatynastar salasynda quqyq buzýshylyq jasaǵan adamdarǵa qatysty profılaktıkalyq yqpal etýdiń negizgi sharalarynyń biri – profılaktıkalyq esepke alý jáne jeke aldyn alý jumystardy júrgizý, maskúnemdikten májbúrlep emdeýge jiberý. Osy kezeńde 803 adam profılaktıkalyq esepke qoıylsa, onyń 733-ine qorǵaý nusqamasy, taǵy 70-ine quqyq buzýshynyń tártibine erekshe talaptar qoıyldy, dep habarlaıdy Almaty-akshamy.kz Polisia.kz-ke silteme jasap.
Alkogolızm men nashaqorlyqtan májbúrlep emdeýge 9 adam jiberildi. Almaty polısıasy zorlyq-zombylyqqa ushyraǵan, sondaı-aq osy saladaǵy qoldanystaǵy zańnamany túsindirýge júgingen 159 áıelge jeke keńestik kómek kórsetti.
Sonymen qatar turmystyq zorlyq-zombylyqtyń aldyn alýǵa baǵyttalǵan profılaktıkalyq is-sharalar Áıelder isteri jáne otbasylyq-demografıalyq saıasat jónindegi komısıanyń, bilim berý, eńbek jáne halyqty áleýmettik qorǵaý organdarynyń, sondaı-aq úkimettik emes uıymdardyń ókilderin tarta otyryp, turaqty negizde júrgizilip jatyr. Jyl basynan beri ÚEU-men 16 kezdesý ótkizildi, onda ÚEU men polısıanyń ózara is-qımylynyń oń tájirıbesi, zorlyq-zombylyq qurbandaryna psıhologıalyq kómek kórsetýdiń tıimdiligi jáne turmystyq zorlyq-zombylyqtyń aldyn alýdyń máseleleri, sondaı-aq olardy sheshý joldary baǵalandy.
Otbasy-turmystyq qatynastar salasyndaǵy jumystar Almaty qalasyndaǵy QMÝ “Jan-Saıa” memlekettik daǵdarys ortalyǵymen, sondaı-aq “Rodnık”, “Analar úıi”, “Tın-CHellendj” qoǵamdyq qorlarymen tyǵyz baılanysta júrgiziledi. Jyl basynan beri daǵdarys ortalyqtaryna 29 áıel ornalastyryldy.