Almaty polısıasy qoǵamda “quqyq buzýshylyqqa múldem tózbeýshilikti” qalyptastyrýǵa erekshe kóńil bólýde, dep habarlaıdy aqshamnews.kz Polisia.kz-ke silteme jasap.
– Múldem tózbeýshilik – usaq quqyq buzýshylyqtarǵa qarsy áreket. Árkim azamattardyń quqyǵyn qurmettep, qoǵamdyq tynyshtyqty buzbaı, óz mádenıetin kórsetýi kerek. Ákimshilik zańnama talaptaryna sáıkes, qoǵamdyq oryndardy lastaǵany jáne qalany abattandyrý erejelerin buzǵany úshin 20-dan 300 AEK-ke deıin aıyppul túrinde jaýapkershilik qarastyrylǵan, – dedi Almaty qalasy PD jergilikti polısıa qyzmeti basqarmasynyń basshysy Serik Shýmaev.
Almatyda jyl basynan beri osyǵan uqsas 36 myńnan astam quqyq buzýshylyq anyqtaldy. Sondaı-aq polıseıler usaq quqyq buzýshylyqtardyń jolyn kesýde qaladaǵy zańdylyq pen tártiptiń jaı-kúıine beı-jaı qaramaıtyn azamattyq qoǵamǵa erekshe ról berilgenin atap ótti.
– Almaty polısıasy belsendi azamattyq ustanymy halyq arasynda “tártipsizdik pen qylmysqa múldem tózbeýshilik”, sondaı-aq jasalǵan zańsyz áreketter úshin “jazanyń bultartpastyǵy” qaǵıdattaryn sińirýge kómektesetin qoǵam ókilderine erekshe alǵysyn bildiredi, – dedi Shýmaev.
Esterińizge sala keteıik, 2024 jyldyń 16 qyrkúıeginen bastap Almatyda “Taza Qazaqstan” naýqany aıasynda abattandyrý salasyndaǵy zań buzýshylyqtarmen kúresý sharalary kúsheıtildi: barlyq jerde reıdtik jáne jergilikti tekserýler júrgizilýde.