«Shekteýsiz ınovasıa: turaqty damyp kele jatqan Alataý qalasy» forýmynyń ashylý saltanaty ótti.
Onda QR Ónerkásip jáne qurylys mınıstri Qanat Sharlapaev sóz sóıledi, dep habarlaıdy aqshamnews.kz.
Bıyl Qazaqstan men Koreıa Respýblıkasy 30 jyldan astam jemisti qarym-qatynastardy atap ótedi jáne ónerkásip pen joǵary tehnologıalar salasyndaǵy yntymaqtastyqty damytýdy jalǵastyrýda.
«Búginde elderimiz arasyndaǵy óndiristik kooperasıa ekonomıkalyq damýdyń qýatty qozǵaltqyshy. Biz jalpy quny 3,8 mlrd dollar bolatyn 20 birlesken ınvestısıalyq jobany júzege asyryp jatyrmyz, bul 10 myńnan astam jumys ornyn qurýǵa múmkindik beredi. Yntymaqtastyǵymyzdyń mańyzdy mysaly – mashına jasaý salasy», – dedi Qanat Sharlapaev.
Sátti yntymaqtastyqtyń mańyzdy mysaldarynyń biri mashına jasaý salasyndaǵy birlesken jobalar. Qazaqstanda KIA avtomobılderin shyǵaratyn zaýyt, «Astana Motors» jáne «Hyundai Motor Company», jolaýshylar vagondaryn, «Hyundai» júk kólikteri men avtobýstaryn shyǵaratyn zaýyttar tabysty jumys isteıdi.
Mınıstr Koreıa Respýblıkasymen saýda-ekonomıkalyq qarym-qatynastar odan ári damyp kele jatqanyn atap ótti. Ótken jyly taýar aınalymy 6 mlrd dollardy qurasa, Qazaqstannyń Koreıaǵa eksporty munaı, ferrohrom jáne tıtan quımalaryn qosqanda 3,8 mlrd dollardy qurady. Bul rette Koreıadan ımport 2,2 mlrd dollarǵa jetti, onyń negizgi taýarlary mashınalar, jabdyqtar jáne turmystyq tehnıka boldy.
Forýmnyń negizgi bóligi «Alataý ındýstrıaldy parkiniń brendıng strategıasy jáne negizgi nysandardy tartýdyń jol kartasy» prezentasıasy boldy. KPMG atqarýshy dırektory Mýn Gý Pak myrza atalmysh jobany júzege asyrýdyń negizgi baǵyttary týraly aıtty.
2024 jyly qurylǵan «Alataý» AEA 96 560 gektar aýmaqty alyp jatyr. Bul qaǵaz ónimderin óndirý, toqyma óndirisi, turǵyn jáne turǵyn emes úı-jaılardy salý sıaqty basym salalarǵa ınvestısıa tartýǵa baǵyttalǵan eldegi eń iri aımaqtardyń biri.
«Bul aımaqtyń mańyzdy maqsaty – joǵary tehnologıaly óndiristerge basa nazar aýdara otyryp, zamanaýı jáne básekege qabiletti óndiris qurý jáne óńirde jumyspen qamtýdy arttyrý. «Alataý» AEA tartylǵan ınvestısıalar men júzege asyrylyp jatqan jobalardyń arqasynda myńdaǵan jumys oryndaryn ashyp, ónerkásiptik ósýdiń mańyzdy qozǵaýshy kúshine aınala alady dep kútilýde», – atap ótti Qanat Sharlapaev.
Qazaqstan uzaq merzimdi yntymaqtastyqty damytý jáne birlesken jobalardy júzege asyrý maqsatynda ońtústik koreıalyq kompanıalarǵa birqatar jeńildikter usynyp otyrǵanyn erekshe atap ótken jón. Atap aıtqanda, Ónerkásipti damytý qory arqyly jeńildetilgen nesıelendirý, salyqtyq jeńildikter, onyń ishinde Qazaqstanda óndiriletin ónimderdi QQS tóleýden bosatý, sondaı-aq jańadan ashylǵan kásiporyndardy alǵashqy úsh jylda salyq tóleýden bosatý. Bul sharalar tartymdy bıznes-ortany qurýǵa jáne tikeleı shetel ınvestısıalarynyń aǵynyn yntalandyrýǵa baǵyttalǵan.