“Taza Qazaqstan” profılaktıkalyq naýqany aıasynda Almaty polısıasynyń qyzmetkerleri barlyq jerde jergilikti reıdter ótkizýde.
Atap aıtqanda, qala turǵyndarynyń súıikti demalys ornyna aınalǵan taýly jáne ormandy aımaqtarda, dep habarlaıdy aqshamnews.kz.
– Ókinishke qaraı, kóp adamdar tabıǵatty qadirlep, qorǵaı bermeıdi. Mysaly, demalystan keıin ózderiniń artynan qoqys tastap ketip, aǵash butaqtaryn syndyryp, balalaryna jaman úlgi kórsetedi. Buryn birneshe ret habarlaǵanymyzdaı, qoǵamdyq oryndardy lastaǵany jáne qalany abattandyrý erejelerin buzǵany úshin jaýapkershilik kúsheıtildi. Sonymen qatar polıseıler múddeli qyzmettermen birlesip, ekologıalyq reıdter júrgizýde, – dedi Almaty qalalyq PD jergilikti polısıa qyzmeti basqarmasynyń bastyǵy Serik Shýmaev.
Eske sala keteıik, Almaty qalasynda quqyq buzýshylyqqa “múldem tózbeýshilik” qaǵıdatyn nyǵaıtý, kóshelerde jáne basqa da qoǵamdyq oryndarda tıisti qoǵamdyq tártipti saqtaý maqsatynda “Taza Qazaqstan” profılaktıkalyq is-sharasy ótkizilýde. Sondaı-aq ol, buzaqylyq, múlikke zıan keltirý, usaq buzaqylyq derekterin anyqtaýǵa jáne jolyn kesýge baǵyttalǵan. Arnaıy mobıldi toptar qurylyp, is-sharany ótkizýge jurtshylyq barynsha tartyldy. Osy kúnderi ýchaskelik polısıa ınspektorlary turǵyn úı alaptarynda, saıabaqtarda, alańdarda, qoǵamdyq oryndarda maqsatty jáne jergilikti reıdter júrgizýde. Osyǵan oraı, Almaty polısıasy qala turǵyndary men qonaqtaryn kez kelgen quqyq buzýshylyqqa tózbeýshilik tanytyp, qorshaǵan ortaǵa, bótenniń múlkine uqyptylyqpen qaraýǵa jáne zańdy qatań saqtaýǵa shaqyrady.
Aqparat kózi Polisia.kz saıtynda: https://polisia.kz/almaty-politsiyasy-tauly-ajmaqtarda-rejd-zhurgizdi/