Almaty polısıasy qaıyrshylardy anyqtaý maqsatynda reıd júrgizip jatyr.
Kún saıyn qoǵamdyq tártipti qamtamasyz etý maqsatynda qalanyń jergilikti polısıa qyzmetiniń ınspektorlary atalǵan qyzmet túrin anyqtap, jolyn kesýmen aınalysady, dep habarlaıdy Almaty-akshamy.kz
Polisia.kz-tiń málimetinshe, kásipkerlik sýbektisi bolyp sanalmaıtyn, sondaı-aq kóripkeldik, qaıyr suraý, ıaǵnı qoǵamdyq oryndarda zattardy satyp alý, satý, aıyrbastaý nemese seksýaldyq sıpattaǵy qyzmetterdi kórsetý maqsatynda adamdardyń mazasyn alý ákimshilik quqyq buzýshylyqqa jatady.
«Almaty elimizdiń qarjy ortalyǵy retinde, ókinishke qaraı, ınvestorlar men týrıserdi ǵana emes, jeńil aqshany jaqsy kóretinderdi de qyzyqtyrady. Qaıyrshylyqtyń basym bóligin kórshi elderdiń azamattary jasaıdy. Mundaı adamdar anyqtalǵan kezde biz olardy tirkeýge alamyz jáne kóshi-qon zańnamasyn buzǵany úshin sot sheshimimen elden shyǵaramyz. Eger halyqaralyq tájirıbeni ustanatyn bolsaq, onda muqtaj jandarǵa kómek kórsetetin arnaıy uıymdarǵa qaıyrymdylyq pen sadaqa bergen jón. Bul qoǵamdyq birlestikter, eriktiler. Jalǵyzbasty qarttar, múmkindigi shekteýli jandar men basqa da muqtaj adamdar olardyń baqylaýyndp. Olarǵa túrli kómek kórsetip turady», – dedi patrúldik polısıa polkiniń komandıri Oral Ahımov.
Bir ǵana aýdannyń ózinde bir aptada qoǵamdyq oryndarda azamattardyń mazasyn alǵan 16 adam ákimshilik jaýapkershilikke tartyldy.
«Sadaqa suraǵandardyń kópshiligi iri bazarlar, saýda úıleri men azamattardyń kóp jınalatyn jerlerinde turady. Bul negizinen kishkentaı balalary bar áıelder. Ata-analarǵa qatysty QR ÁQBtK-niń 449-babyna sáıkes quqyq buzýshylyq deregi boıynsha ákimshilik materıal jınaldy. Qaıyrshylar jıi joldyń ortasynda júredi, osylaısha jol qozǵalysyna qatysýshylarǵa naqty qaýip tóndiredi», – dedi Ahımov.