Jyl basynan beri Almatyda mopedterdiń kesirinen 199 jol-kólik oqıǵasy bolǵan.
Polısıa mopedpen ereje buzatyn kýrerlerge aıyppul salý tásilin tapty, dep habarlaıdy Almaty-akshamy.kz
Megapolıste mopedterdiń qatysýymen jol oqıǵalary jıilep ketti. Oǵan qosa, kýrerler erejeni saqtamaıdy, shlem taqpaıdy, jaıaý júrginshiler jolyna shyǵyp ketedi. Osydan keıin almatylyq polıseıler jetkizý qyzmetteriniń ókilderimen kezdesip, naqty sharalardy qolǵa alýǵa kelisti. Memorandýmǵa da qol qoıyldy.
Sergek Development kompanıasynyń ókili Nurbol Ámirjannyń aıtýynsha, pılottyq joba boıynsha kýrerlikpen aınalysatyn barlyq kompanıalardyń jetkizý qyzmetkerleri týraly aqparat engizilgen arnaıy baza jasaqtalady.
"Ár jetkizý qyzmetiniń ókiline jaryqpen shaǵylysatyn nomer taǵaıyndalady. Sol nomer arqyly onyń qozǵalysy "Sergek" kameralarymen qadaǵalanady. Joba jol-kólik oqıǵalaryn azaıtýǵa múmkindik beredi", - deıdi Ámirjan.
Pılottyq joba ázirge profılaktıkalyq maqsatta qolǵa alyndy. Qazirgi tańda mopedterge qatysty tıisti zańnamalarǵa ózgerister engizý qarastyrylýda. Zań kúshine engen soń, talap ta kúshetiledi.
"Qazaqstan Respýblıkasy Ákimshilik kodeksiniń 615-babynyń normalary boıynsha biz ony olardy ákimshilik jaýapkershilikke tarta alamyz. Olar moped degen uǵymmen emes, jol júrý qozǵalysyna basqa da qatysýshylar degen uǵymmen. Negizi zańnama kúsheıtiledi qazirgi tańda mindetti túrde. Mopedterdi bólek kólik quraly etip sanaıdy, sondyqtan, mopedti tizgindegen azamattar mindetti túrde óz kólik quralyn tirkeýge qoıý kerek jáne jol júrý kýáligin ıemdenýi tıis", - dep atap kórsetti polısányń resmı ókili Saltanat Ázirbek.