Ótken jyly Almaty qalasynda 6 785 jol-kólik oqıǵasy tirkelip, onyń saldarynan 105 adam qaza taýyp, 7 370 adam túrli jaraqattar aldy.
Jol-kólik oqıǵalarynyń kópshiligi tek óreskel erejelerdi buzý ǵana emes, keıbir júrgizýshilerdiń áleýmettik jelilerde ózin kórsetý maqsatynda zańsyz áreket etýi saldarynan da oryn alýda, dep habarlaıdy aqshamnews.kz Polisia.kz-ke silteme jasap.
– Qurmetti júrgizýshiler men jol qozǵalysyna qatysýshylar! İshki ister mınıstrligi qoǵamda «Zań jáne Tártip» qaǵıdatyn nyǵaıtý jáne joldardaǵy qaýipsizdikti qamtamasyz etý jumysyn belsendi túrde jalǵastyrýda. Sońǵy kezderi kólik júrgizýshileriniń áleýmettik jelilerde haıp jasap, ózderine nazar aýdartý úshin jol erejesin ádeıi buzý jaǵdaılary jıi kezdesýde. Bul is-áreketter tek óz qaýipsizdigińizge ǵana emes, sonymen qatar barlyq jol qozǵalysyna qatysýshylar úshin úlken qaýip týdyrady. Jol erejesin buzý ázil emes ekenin umytpańyzdar. Mundaı áreketter úshin ákimshilik jaýapkershilik qarastyrylǵan jáne barlyq quqyq buzýshylar zań aldynda jaýap beredi. Jol qaýipsizdigi – bizdiń ortaq mindetimiz! Barlyǵymyz jolymyzdy qaýipsiz etýge atsalysaıyq! Ózińizdi jáne ózgelerdi abaılap júrińiz, – dep atap ótti Almaty qalalyq PD jergilikti polısıa qyzmeti basqarmasy bastyǵynyń orynbasary Tımýr Noǵaıbaev.