Almaty polısıasy alaıaqtyqqa jol bermeý úshin ınternet-platformalardyń ákimshilerine bıometrıka men qosarlanǵan aýtentıfıkasıany usyndy
Bul ıdeıany Almaty polısıasynyń basshysy Arystanǵanı Zapparov halyq aldyndaǵy dástúrli esep berý kezdesýinde aıtty, dep habarlaıdy Almaty-akshamy.kz Polisia.kz-ke silteme jasap.
«Buǵan pandemıa kezinde barlyǵynyń úıden shyqpaı ómir súrý saltyna aýysýy, el boıynsha shekteý sharalarynyń kúshine enýi, azamattardyń úıde bolýy áser etti, osyǵan baılanysty adamdar ınternet-saýda, jetkizý jáne basqa da qarjylyq qyzmetterge onlaın rejıminde júginýge májbúr boldy. Osyndaı oqıǵalardy eskere otyryp, qaskóıler de beıimdelip, alaıaqtyq jasaýdyń kontaktili ádisinen kontaktisiz ádiske kóshti. Jalpy alǵanda, absolútti sandar túrinde bylaı kórinedi, eger 5 jyl buryn jalpy shyǵyn 1,7 mln teńge bolsa, qazir 3 mlrd teńgege jetti», – dedi Arystanǵanı Zapparov.
Ol sonymen qatar polısıa jetekshi ınternet-resýrstardyń ókilderimen jumys kezdesýin ótkizgenin aıtty. Onda aqparattyq jáne ekonomıkalyq qaýipsizdik krıterıılerin ózgertý usynyldy jáne bıometrıa – adam beınesin taný, qosarly aýtentıfıkasıa sıaqty sharalardy engizý aıtyldy.
«Biz óz qyzmetimizde ınternettegi zańsyz materıaldardy anyqtaý jáne buǵattaý boıynsha jumysty júıelendirý jáne ońtaılandyrýǵa arnalǵan “Kıberqadaǵalaý” aqparattyq baǵdarlamasynyń múmkindikterin de paıdalanamyz. Qarapaıym sózben aıtqanda, bul baǵdarlama zańsyz mazmundyq belgileri bar saıttarǵa siltemelerdi avtomatty túrde baǵyttaýǵa múmkindik beredi. Biz, búkil el boıynsha buǵattalǵan nemese qoljetimdiligi shekteýli 1 myń 400-den astam siltemeler men saıttardy anyqtadyq jáne baǵyttadyq. Keshendi jumystyń nátıjesi óz aldymyzda. Biz ınternet-alaıaqtyqty tirkeýdi 32,8%-ǵa qysqartýǵa qol jetkizdik», – dedi Almaty qalasynyń bas polıseıi.
Kıberqylmyspen kúrestiń tıimdiligin arttyrý maqsatynda İshki ister mınıstrliginiń bastamasymen ótken jyly İİM Almaty akademıasynda “kıberortalyq” qurylyp, onyń qyzmetkerleri jańa qaýipsizdik baǵdarlamalaryn ázirleýde jáne ınternet ortasyn zerttep, jelidegi zańsyz resýrstarǵa kirýdi jyldam bloktaý jáne aldyn alý joldaryn úırenip jatyr.