Almaty polısıasy qoǵamdyq kólikterdi tekserýde.
Almaty qalasynyń polısıa departamenti 10-16 maýsym aralyǵynda “Qoǵamdyq kólik” jedel-aldyn alý is-sharasyn júrgizip jatyr, dep habarlaıdy Almaty-akshamy.kz Polisia.kz-ke silteme jasap.
Bul is-shara kólik quralymen jolaýshylar men júkti tasymaldaıtyn júrgizýshilerdiń kólik jáne eńbek tártibin arttyrýǵa, tehnıkalyq aqaýy bar nemese qaıta jabdyqtalǵan jolaýshylar kóligin paıdalaný derekterin anyqtaýǵa, sondaı-aq zańsyz jolaýshylar tasymalynyń jolyn kesýge baǵyttalǵan.
– Birinshiden, qoǵamdyq kólik júrgizýshilerine úndeý tastap, jol qozǵalysy erejelerin qatań saqtaýdy, jolaýshylarǵa sypaıy jáne durys qaraýdy eskertemiz. Sizge adamdardyń ómiri senip tapsyrylǵanyn jáne olardyń qaýipsiz, yńǵaıly qozǵalysyn qamtamasyz etýge mindetti ekenińizdi este saqtańyz. Sonymen qatar UBT-ǵa, ekskýrsıaǵa jáne týrısik saparlarǵa balalardy tasymaldaý kezinde uıymdasqan toptardy tasymaldaý erejeleriniń talaptaryn saqtaý qajettigin eske salamyz. Balalardy kólikte tasymaldaý kezinde olardy ustaıtyn quraldardy jáne avtokólik oryndyqtaryn paıdalaný qajet, – dedi Almaty qalalyq PD ákimshilik polısıa basqarmasynyń bastyǵy Asqat Qulbaev.
Sondaı-aq spıker kóliktiń kez kelgen túrin basqarǵan kezde jan-jaqqa alańdamaý jáne telefondy qoldanbaý kerektigin eske saldy. Bul jol-kólik oqıǵalaryn boldyrmaýǵa múmkindik beretinin aıtty.