Qazaqstan polısıasy kúnine arnalǵan keń aýqymdy ımıjdik-ıdeologıalyq naýqan aıasynda Almaty qalalyq PD-de erlik sabaǵy ótti, dep habarlaıdy aqshamnews.kz Polisia.kz-ke silteme jasap.
Oǵan zamanymyzdyń naǵyz qaharmandary – tótenshe jaǵdaılarda adam ómirin saqtap qalǵan polısıa qyzmetkerleri qatysty. Áriptesterimen kezdesýde olar, adamdardy órtten qalaı alyp shyqqany, kópirlerdegi qaıǵyly oqıǵalardyń aldyn alǵany, tótenshe jaǵdaılardan zardap shekkenderdi qalaı qutqarǵany týraly áńgimelep berdi. Erligi men janqıarlyǵy úshin olardyń kópshiligi memlekettik nagradalarmen, medaldarmen, Qurmet gramotalarymen marapattaldy.
Árbir oqıǵa – borysh, namys, Otanǵa degen súıispenshilik sezimine toly erlik shejiresi. Tyńdarmandardyń patrıottyq rýhy men shynaıy qurmeti sharaǵa erekshe kóńil-kúı syılady. Erlik sabaǵy jastardy tárbıeleýdiń, jas qyzmetkerlerdiń boıynda antqa adaldyq pen mamandyqtyń joǵary adamgershilik talaptaryn qalyptastyrýdyń mańyzdy elementine aınaldy. Oǵan Almaty qalalyq polısıa Departamentiniń qyzmetkerleri ǵana emes, Mamandandyrylǵan kúzet qyzmeti Basqarmasynyń ókilderi, sondaı-aq QR İİM M.Esbolatov atyndaǵy Almaty akademıasynyń kýrsanttary qatysty.
"Erlik – tek qana dańqty ister emes. Bul – árbir polıseıdiń kúndelikti, janqıarlyq eńbegi. Erlik kórsetken áriptesterimiz, Qazaqstan polısıasy – Zań men adam ómiriniń saqshysy ekenine jandy dálel. Mundaı kezdesýler rýhtandyrady, tálim-tárbıe beredi, biriktiredi. Eń bastysy – bul erlik sabaǵyn bolashaq quqyq qorǵaýshylarymyz – jas qyzmetkerlerdiń tyńdaǵany óte mańyzdy", – dedi, Almaty qalalyq polısıa departamenti bastyǵynyń orynbasary Ádilǵoja Qusaıynov.
İs-shara Qazaqstan polısıasynyń 33 jyldyǵyna arnalǵan is-sharalar kesheniniń bir bóligi boldy jáne korporatıvtik maqtanysh sezimin nyǵaıtýǵa, kásipti tanymal etýge jáne qoǵamda polısıa qyzmeti týraly oń kózqarasty qalyptastyrýǵa baǵyttalǵan.