Óńirlik komýnıkasıalar qyzmetiniń alańynda Almaty qalasy Polısıa departamentiniń resmı ókili Saltanat Ázirbektiń qatysýymen brıfıń ótti, dep habarlaıdy Almaty-akshamy.kz.
Spıker tártip saqshylary 2023 jyldyń 10 aıyna JKO taldaýyn júrgizgenin, sondaı-aq júrgizilip jatqan profılaktıkalyq jumystar týraly habar bergenin aıtty.
Bıylǵy 10 aıda Almatyda 2 myń 991 JKO tirkelip, sonyń saldarynan 84 adam kóz jumly, taǵy 3 myń 211 adam jaraqat aldy.
Jyl basynan beri barlyǵy 1 mıllıon 582 myń 980 ret jol qozǵalysy erejeleri buzylǵany anyqtaldy. Kólik quralyn mas kúıinde basqarǵany úshin 1 myń 718 júrgizýshi ustaldy. Sot 2 myń 443 júrgizýshini kólik quralyn basqarý quqyǵynan aıyrdy.
Aıta keteıik, Almatyda joldaǵy jaǵdaıǵa Departament polıseıleri kún saıyn taldaý júrgizedi, megapolıste mezgil saıyn jedel-profılaktıkalyq is-sharalar ótkiziledi.
«Bizdiń qalamyzda «Qorǵaý – qaýipti júrgizýshi» avtomattandyrylǵan júıesi jumys isteıdi, ol qozǵalystyń qarsy jolaǵyna shyǵatyndardy, jalǵan nómirlik belgilerdi paıdalanatyn jol qozǵalysy erejelerin buzýshylardy, kólik quralyn basqarý quqyǵynan aıyrylǵan, biraq soǵan qaramaı, kólik júrgizetinderdi anyqtaýǵa múmkindik beredi. Bul is - sharalardyń barlyǵy Almatydaǵy jol jaǵdaıyn baqylaýǵa múmkindik beredi», - dedi Saltanat Ázirbek.
Jýrnalıserdiń suraqtaryna jaýap bere otyryp, Polısıa departamentiniń resmı ókili jol erejesin kóbine jolda júrý tájirıbesine qaramaı, tártipke baǵynbaıtyn júrgizýshiler jıi buzatynyn aıtty.
«Iá, jańadan kólik aıdap júrgender óte saq, biraq olardyń tájirıbesi az. Ókinishke oraı, olar jaǵymsyz jaǵdaılarǵa tap bolady, apat jasaıdy, árıne, aýyr zardaptarmen emes. Aıta ketý kerek, eń jaqsy qaýipsiz júrgizýshi – tártipke baǵynǵan, kásibı, jol qozǵalysy erejelerin qatań saqtaıtyn, jol qozǵalysynyń basqa qatysýshylaryna qurmetpen qaraıtyn adam», - dedi S.Ázirbek.
Spıker jol qozǵalysynyń barlyq qatysýshylaryn óz is-áreketterine jaýap berýge jáne balalarǵa durys úlgi kórsetýge shaqyrdy.
Saltanat Ázirbek mas júrgizýshiler máselesine de toqtaldy. Onyń habarlaýynsha, jyl basynan beri Almaty qalasy PD saptyq bólimsheleriniń kúshimen qala joldarynda 1718 mas júrgizýshi ustalǵan. Mundaı buzýshylyq úshin 7 jylǵa deıin júrgizýshi kýáliginen aıyrý qaýpi bar.