Jaqynda Almaty qalasynyń Medeý aýdanyna qarasty mektepterdiń 10–11 synyp oqýshylary QR Energetıka mınıstrligine qarasty Iadrolyq fızıka ınstıtýtynda (IaFI) boldy. Bul ekskýrsıa IaFI men №7 jalpy bilim beretin mektep jáne Medeý aýdandyq bilim bóliminiń arasyndaǵy ózara yntymaqtastyq týraly memorandým aıasynda uıymdastyryldy.
Instıtýttyń ǵalymdary men mamandary balalarǵa beıbit atom qalaı jumys isteıtinin, atom reaktorynyń qurylymyn jáne ıadrolyq energıanyń qaýipsizdigi týraly túsindirip berdi.
IaFI-degi ekskýrsıa barysynda oqýshylar osy jáne basqa da kóptegen suraqtaryna jaýap aldy.
«Bul meniń eń erekshe ekskýrsıam boldy! Bizge ıadrolyq reaktordyń qalaı jumys isteıtinin, ınstıtýtta qandaı ǵylymı tájirıbeler júrgiziletinin jáne beıbit atomnyń mánin kórsetti. Óte qyzyqty ári tanymdy boldy. Biz tek jańa aqparat alyp qoımaı, ǵylymı qyzmettiń atmosferasyn sezindik. IaFI bazasynda óndiriletin biregeı ónimderdi de kórdik», – dep óz áserimen bólisti №48 mektep-lıseıiniń 10V synyp oqýshysy Kırıll Karasúk.
Jas qonaqtar biregeı zertteý reaktory – VVR-K men ILÝ-10 údetkish keshenin kórdi. Sondaı-aq, atom energıasynyń beıbit maqsatta qalaı qoldanylatynyn bildi jáne alǵash ret ǵalymdarmen tikeleı júzdesti.
Oqýshylardy reaktorlardyń qaýipsizdigi, atom salasynyń damýy jáne Qazaqstanda AES salý perspektıvasy erekshe qyzyqtyrdy.
«Ekskýrsıa oqýshylarǵa óte unady, olar kóptegen suraqtar qoıyp, belsendi qyzyǵýshylyq tanytty, kórgen-bilgenderin ózara talqylady, – dedi №7 jalpy bilim beretin mekteptiń dırektory Janar Orazalıeva. – «Birtutas tárbıe» baǵdarlamasy aıasyndaǵy osyndaı is-sharalar balalardyń dúnıetanymyn keńeıtýde úlken ról atqarady. Sebebi olar ár balanyń shyǵarmashylyq jáne ıntellektýaldyq áleýetin jeke erekshelikterine saı tolyq ashýǵa baǵyttalǵan».