Almatyda ónerkásip óndirisiniń kólemi turaqty ósim kórsetip otyr. 2025 jyly qańtar-mamyr aralyǵynda óndirilgen ónim kólemi 976,2 mlrd teńgege jetti. Bul jóninde qalalyq kásipkerlik jáne ınvestısıalar basqarmasy habarlady.
Mashına jasaý salasynda eń úlken ósim baıqalǵan, óndiris kólemi 36,3% artyp, 366,1 mlrd teńgege jetti, oǵan óńdeýshi ónerkásiptiń jalpy kóleminiń 46,7%-y tıesili. Mashına jasaý qurylymynda negizgi úlesti (36,1%) kólik qurastyrý salasy ıelenip otyr.
Ósim ózge de negizgi salalarda tirkeldi: basqa beımetall mıneraldy ónimder óndirisi 25,6% artyp, 47 mlrd teńgege jetti, baspa isi 27,3% ósip, 25 mlrd teńge boldy. Farmasevtıka óndirisi 14,2% (11,2 mlrd teńge), kıim óndirisi 18,8% (3,7 mlrd teńge), aǵash buıymdary óndirisi 35,2% (3,4 mlrd teńge) ósti.
Qazirgi tańda Almatyda 144 iri jáne orta ónerkásiptik kásiporyn jumys isteıdi. Deni Jetisý, Túrksib jáne Alataý aýdandarynda shoǵyrlanǵan.
Almatynyń Indýstrıalyq aımaǵy men «Inovasıalyq tehnologıalar parki» AEA qarqyndy damyp keledi. 2025 jyly Indýstrıalyq aımaqta jalpy quny 135,4 mıllıard teńge bolatyn 11 jobany iske qosý josparlanǵan. Bul jobalar nátıjesinde 4 myń jańa jumys orny ashylmaq. Al arnaıy ekonomıkalyq aımaqta 18,5 mıllıard teńgeniń 6 jobasyn iske qosý jáne 415 jumys ornyn qurý kózdelgen.
Buǵan qosa, Almatyda búginde 1,5 myńnan astam adamdy jumyspen qamtyp otyrǵan 15 shaǵyn ónerkásiptik park jumys isteıdi. 2027 jylǵa deıin jalpy aýdany 194 myń sharshy metr bolatyn taǵy 35 park salý josparlanǵan. Bul bastama aıasynda 21,8 mıllıard teńge ınvestısıa tartylyp, qosymsha 4,2 myńnan astam jumys orny ashylady.