«Aýyl statýsyn alǵymyz keledi»
Almaty oblysy ákiminiń baspasóz hatshysynyń aıtýynsha, saıajaılarǵa ınjenerlik jáne ınfaqurylymdyq júıeni qarastyrý josparlanyp jatyr
«Aýyl statýsyn alǵymyz keledi». Almaty oblysyndaǵy Talǵar saıajaıynyń turǵyndary turmysymyz turalap qaldy dep bas kóterdi, dep habarlaıdy Almaty-akshamy.kz Almaty.tv–ge silteme jasap.
Jaryq jıi óship, jolymyz jasalmaıdy degen jurt, qazir turǵyndar ózara qyrqysyp otyr deıdi. Olardyń aıtýynsha saıajaıda biri qazirgi tóraǵaǵa qarsy bolsa, endi biri qoldaıdy.
«Urlyq kóp. Aýyl bolsaq, halyq ta tynyshtalady. Elektr jaryǵyn esepteýish quralymen tóleımiz. Bizdiń kishkentaı balamyz bar, tońazytqyshymyz bar, ol kúıip ketti, kim tóleıd», – dedi saıajaı turǵyny Ásel Aınaqulova.
Turaqsyz toqtyń kesirinen turmystyq tehnıkanyń bári isten shyqty degen turǵyndar sýdy da surap ishe almaıtyn kez bolady deıdi. Sebebi, tóraǵaǵa shaǵym aıtsa tirshilik nárin de óshirip tastaıtyn kórinedi.
«Bizde 2 mıllıon 700 myń qaryz deıdi. Ol múmkin emes halyq ondaı qaryz bolýy. Óıtkeni biz degen aqshany tóleımiz 26 teńgeden, olar 19 teńgemen tóleıdi. 7 teńge tóraǵa qaltasynatúsedi», – dedi saıajaı turǵyny Erlan Jamalbekov.
Der kezinde jaryqtyń aqysyn tóledik degen jurt esebin qazirgi tóraǵadan surap otyr. Al basshy aýyldyń biraz máselesin rettegenin jáne esep berýge daıyn ekenin jetkizdi.
«2019 jyly osy sýdy men jalǵyz júrip bitirdim. 2-transformatordy qoıǵyzdym. 11 jyl buryn qaryzym bolǵan joq. Endi 2 áıel keldi de. halyqty 2-ge bóldi. Burynǵa tóraǵa qashyp ketken kezde, halyq 3 aı jaryqsyz qalǵan. Qazir zańdy. Osy jerdiń túgel qujatyn qalpyna keltirdim», – dedi «Talǵar» saıajaıynyń tóraǵasy Gúlshat Árpeısova.
Keńdala aýyldyq okrýgine 80 saıajaı qaraıdy. Ákimniń aıtýynsha, ár saıajaıdyń ózderi saılaǵan tóraǵalary bar. Sondyqtan zań boıynsha ákimdiktiń aralasýǵa quqy joq. Biraq aýyl statýsyn alyp berý máselesin oblys ortalyǵyna jetkizipti.
«2 aı boıy biz osy statýs máselesimen jumys jasadyq. Qanat Aldabergenulynyń tapsyrmasymen qazir Almaty oblysyndaǵy saıajaılarǵa statýs berý máselesi kóterilip jatyr. Kerek aqparattyń bári taldanyp, basshylyqqa jiberildi», – dedi Keńdala aýyldyq okrýgi ákimi Almas Nurdáýletuly.
«Almaty oblysy ákimine oblys aýmaǵyndaǵy saıajaılarǵa aýyl statýsyn berý týraly másele joldanǵan bolatyn. Bul tek atalǵan Talǵar saıajaıyna qatysty emes, barlyq eldimekenge qatysty. Saıajaılarǵa qaladaǵydaı, ınjenerlik jáne ınfaqurylymdyq júıeni de qarastyryp berý josparda bar», – dedi Almaty oblysy ákiminiń baspasóz hatshysy Rýslan Sárseev.
Talǵar aýdandyq komýnaldyq bólimi saıajaıdaǵy jaryq máselesi jıi óshetinin rastap otyr. Oǵan turǵyndardyń qaryz bolýy sebep deıdi. Al endigi jaryq bereshek ótelmeı qosylmaıtyn kórinedi.