Qazaqstan Respýblıkasy İshki ister mınıstrliginiń kıberqylmysqa, onyń ishinde ınternet-alaıaqtyqqa qarsy is-qımyl jónindegi baǵdarlamasy sheńberinde Almaty oblysy polısıa departamentiniń krımınaldyq polısıa basqarmasy jyl basynan beri aıtarlyqtaı nátıjelerge qol jetkizdi.
Jedel-izdestirý is-sharalary barysynda túrli sıpattaǵy 46 qylmystyq iske qatysy bar 74 kúdikti anyqtaldy, dep habarlaıdy aqshamnews.kz Polisia.kz-ke silteme jasap.
Jumys qorytyndysy boıynsha 117 qylmystyq is aıaqtalyp, sotqa joldandy, bul ınternet-qylmyskerlermen kúreske baıypty kózqarasty aıǵaqtaıdy.
– Operasıa barysynda aqsha qarajattarynyń zańsyz aınalymymen aınalysqan 62 tulǵa ustaldy. Kıberkeńistiktiń turaqty monıtorıńi nátıjesinde alaıaqtyq áreketter júzege asyrylǵan 177 jalǵan ınternet-saıttardy buǵattaýǵa múmkindik týdy. Sondaı-aq, kıberqylmysqa kúdikti 56 adamnyń shottary jabylyp, zardap shekkenderge 36 mln 462 myń teńge somadaǵy aqshalaı qarajat qaıtaryldy, – dep túıindedi Almaty oblysy PD KPB bastyǵynyń orynbasary Nurjan Keńesqanuly.
Krımınaldyq polısıa basqarmasy ınternet-alaıaqtyq salasyndaǵy qylmystardyń aldyn alý jáne ashý boıynsha belsendi jumysyn jalǵastyrýda. Oblys turǵyndary men qonaqtaryna onlaın-satyp alýlar men qarjylyq operasıalardy júzege asyrý kezinde qyraǵylyq tanytýǵa, al kúdik týyndaǵan jaǵdaıda dereý quqyq qorǵaý organdaryna júginýge keńes beredi.