Oblysta 34 aýmaqty sý basý qaýpi bar
Almaty oblysynda qaýipti deńgeıdegi 34 aýmaqty sý basýy múmkin. Aldyn alamyz degenmen, ázirge amalyn tappaǵan Jambyl aýdanynyń turǵyndary da qıyndyq kórip otyr. Kósheni shaıyp ketken sý esik aldyna shyǵar joldy da bógepti, dep habarlaıdy Almaty-akshamy.kz Almaty.tv-ge silteme jasap.
6 kún buryn bastalǵan tasqyn áli de toqtamaǵan. Kerisinshe sýdyń deńgeıi kóterilip, qar erip, jaǵdaı qıyndaı túsken.
«Kelip jatqan qutqarýshylar eshteńe jasaı almaı jatyr. Ákelgen apparaty jerdi qaza almaıdy. Sondyqtan sý joldy jaýyp, júrýge múmkindik bolmaı qaldy», – dedi Sarybaı bı aýylynyń turǵyny Aınur Sovethanqyzy.
«Qyzyl sý basyp ketedi, jylda qaıtalanady. Byltyr jol salynyp, turǵyndar qýanyp qalyp edi. Bıyl kórshiniń úıi batyp ketti, qorasyna deıin sý basyp qaldy», – dedi Sarybaı bı aýylynyń turǵyny Meıramhan Qarabekqyzy.
50-ge jýyq maman túrli tásil istegenimen ázirge sýdyń toqtar túri joq. Tústen keıin aǵyny kúsheıetin taý sýy úı aldyn túgel alyp ketken. Tasyp kelip, toqtap turǵan sý qazir kóshedegi qozǵalysty tejegen. Tótenshelikter oqıǵa ornynda jumys istep jatqanymen, máseleni tolyqqandy sheshý ázirge múmkin bolmaı tur.
«Aryq qazylmaǵan. Sol sebepti sýdyń aǵysyn kóshe boıymen ózenge qaraı burý jumystary júrgizilip jatyr», – dedi Jambyl aýdandyq TJB bastyǵy Ersin Jaǵyparov.
«Aryq júıesin salý úshin 3 aýylǵa 30 mıllıondaı aqsha surap otyrmyz. Soǵan búdjettik suranys berip qoıdyq», – dedi Qarasý aýyldyq okrýginiń ákimi Nurjan Dáýrenbaev.
Suranysty jergilikti máslıhat jıynynda qaraıdy. Sheshim shyqsa, jumys atqarylady. Al oblysta osyndaı 34 aýmaqty sý basý qaýpi bar.