On balanyń úsheýi aýrýhanada jatyr
Almaty oblysynda ýlanǵan 10 oqýshy belgisiz jazýy bar, sheteldik taǵamnan zıan shegýi múmkin. Osylaı degen mektep dırektory men ata-analar dúkennen satyp alǵan tuzdalǵan taıaqshalardy jegennen soń, jetkinshekterdiń jaǵdaıy nasharlaı túskenin aıtady, dep habarlaıdy Almaty-akshamy.kz Almaty.tv-ge silteme jasap.
Báıterek aýylynda ýlanǵan 10 oqýshynyń úsheýi aýrýhanada jatqanyna búgin tórtinshi kún. Jelide jeldeı esken jazba arqyly tutas aýyl qazir ushynǵan oqýshylardyń jaǵdaıyna alańdaýly. Eń soraqysy da sol – ólim aýzynan aman qalǵan jetkinshekter belgisiz taǵamdy da sol jeli arqyly tanyp, kórgen eken.
–10 qyz aqsha shyǵaryp, ashshy taıaqsha alyp jegen. Sony jep, ýlanyp qaldy. Menen «alyp jesem bola ma» dep surap júrgen. Mekteptiń asqanasyna shaǵym joq, óıtkeni meniń qyzym asqanadan tamaq ishpeıdi, – dep habarlaıdy ata-ana Razıa.
Qytaı taıaqshalaryn jegennen soń talyp qulaǵan 10 oqýshy Baıterek aýlyndaǵy mektepte bilim alady. Ustazdary «olar birinshi sabaqta-aq júregi aınyp, qusa bastady» deıdi. Keıin osy mekemeden birden aýrýhanaǵa jetkizipti.
– Qytaısha jazylǵan, ne qazaq, ne orys tilinde aýdarylmaǵan, saqtaý merzimi joq zatty alyp jemeńder» dep synypty aralap bárine aıtyp shyqtym. Ata-analarǵa da eskerttik, – dedi Báıterek orta mektebiniń dırektory Jazıra Balahan.
Jalpaq jurt jaman atty qylǵan jergilikti dúkenge biz de bas suqpaq bolyp bardyq. O basta esigin tars jaýyp, bizdi kirgizbeı qoıdy.
Tuzdalǵan taıaqshalardy jep ýlandy degen 10 oqýshy dál osy dúkennen satyp alǵan. Mundaǵy satýshylar da ony rastap otyr. Olardyń aıtýynsha, suranys bolǵan soń, sórege ákelip qoıǵan. Sondyqtan aty jazylmaǵan, zaty belgisiz taýardy teksermeı satqanymyzǵa kináli ekenin moıyndaıdy.
– Oqýshylar ýlanǵany jóninde mamandar tarapynan naqty aqparat aıtylmady ǵoı. Ázirge bári jalǵan. Bizdiń qateligimiz - qytaısha jyzylǵan sózdi túsinbedik, Taýardy qabyldap alǵanda saqtaý merzimine muqıat qaraımyz, – dedi dúken satýshysy Roza Janyqulova.
Al aýdandyq aýrýhanaǵa túsken 10 balanyń jeteýi ambýlatorıalyq em alý úshin úıine jiberilipti. Al úsheýinde áli álsizdik bar. Sondyqtan saqtyq úshin qazir dáriger baqylaýynda eken.
– On naýqas "jedel járdem" kóligimen jetkizildi. Naýqastardy tolyq medısınalyq tekserýden ótkizip, belgisiz taǵammen ýlanǵany belgili boldy. Qaýipti taǵam, hımıalyq zattarmen 5 jasqa deıingi balalar ýlanady. Úı jaǵdaıynda balanyń densaýlyǵyna óte qaýipti, ólip ketýi múmkin, – dedi Eńbekshiqazaq aýdany ortalyq aýrýhanasy dırektorynyń orynbasary Álıa Omarbekova.
– 2023 jyldyń 19 mamyrynda ónim men jetkizýshini anyqtaý maqsatynda tergeý jumystary bastalyp, nátıjesinde shyǵý tegi belgisiz taıaqshanyń satylymda joq ekeni anyqtaldy. Ótinimdi rastaıtyn tıisti qujatsyz júrgizilgen, – dedi Almaty oblystyq sanıtarlyq-epıdemıologıalyq baqylaý departamentiniń baspasóz hatshysy Temirlan Aıtbaev.
Al atalǵan iske qatysty kináli taraptardy anyqtaý úshin materıal Talǵar aýdandyq polısıa basqarmasyna jóneltilipti.