Ortalyq Talǵar aýdanynda ornalasqan.
Almaty oblysynda respýblıkalyq «Zhas Project» jobasy aıasynda múgedektigi bar balalardy beıimdeý ortalyǵy jumysyn bastady, dep habarlaıdy Almaty-akshamy.kz QazAqparatqa silteme jasap.
Azamattyq bastamalardy qoldaý ortalyǵynyń baspasóz qyzmetiniń málimeti boıynsha, múmkindigi shekteýli balalar men jastardy beıimdeýge arnalǵan dene shynyqtyrý-saýyqtyrý ortalyǵy Almaty oblysynyń Talǵar aýdanynda ornalasqan. Ony burynǵy sportshy Anastasıa Rápolova grant aıasynda ashty.
«Sportpen kásibı turǵyda 10 jyl boıy aınalysyp kelemin. 2 toptaǵy múgedek bola tura, men beıimdeý sporty adamdardyń aldynda jańa múmkindikterdi ashatynyna, tózimdilikke, ómirden lázzat alýǵa, qorqynysh pen uıańdylyqty jeńýge úıretetinine kóz jetkizdim», - deıdi Anastasıa Rápolova.
Aıta ketsek, «Zhas Project» jobasy áleýmettik osal toptardaǵy jastardy nátıjeli jumyspen qamtýǵa tartýǵa, sondaı-aq jergilikti jerlerde bıznes-ıdeıalardy qoldaýǵa baǵyttalǵan. Ol Aqparat jáne qoǵamdyq damý mınıstrliginiń jáne Azamattyq bastamalardy qoldaý ortalyǵynyń qoldaýymen júzege asyrylady. Osylaısha, Almaty, Jetisý, Qaraǵandy, Mańǵystaý, Túrkistan jáne Ulytaý oblystarynda 252 bastamashyl top 1 mln teńgege deıingi grantqa ıe bolyp, óz ıdeıalaryn iske qosýǵa kiristi. Granttyq jobanyń 25-sin Almaty oblysynyń jastary, 38-in Jetisý oblysynyń jastary júzege asyryp jatyr.
