Almatyda qalalyq júk tasymaly, magıstraldyq jeli jáne kólik polısıasynyń ókilderi oqýshylardy temirjoldaǵy qaýipsizdik erejelerin saqtaýǵa shaqyrdy.
Mamandardyń aıtýynsha, bıylǵy jyldyń 9 aıynda Almaty qalasy mańynda poıyz 9 ret adam basyp, onyń 5-eýi qaza tapqan, dep habarlaıdy Almaty-akshamy.kz QazAqparatqa silteme jasap.
«2022 jyldyń 9 aıynda Almaty óńiriniń (Almaty-1, Almaty-2, Buryndaı, Shamalǵan, Baıserke, Qaırat stansıalary) shekaralarynda lokomotıv brıgadalary bógde adamdardyń temirjolǵa shyǵyp ketýine baılanysty 132 ret shuǵyl tejeýdi qoldandy. Bul rette, adam basýdyń 9 jaǵdaıyna jol berilgen, onyń ishinde 5 jaǵdaı ólimmen aıaqtaldy. Negizgi sebep – zardap shekkenderdiń qaýipsizdik sharalaryn saqtamaýy. Joldy qysqartý úshin olar temirjol jelilerin belgilenbegen jerlerde, jaqyndap qalǵan poıyzdyń aldynan kesip ótpek bolǵan. Japa shekkenderdiń biriniń alkogóldik ishimdik ishkeni, al ekinshisiniń sýısıd jasaý faktisi anyqtaldy», - dedi mamandar.
Olar sondaı-aq, oqýshylardy qaýipsizdik erejelerin saqtaýǵa shaqyryp, temirjol nysandarynda gadjetterdi, qulaqqaptardy paıdalanbaýǵa, vagon tóbesine shyǵyp elektr toǵyna túsip qalmaýǵa, temirjol kópirleriniń metal konstrýksıalaryna kóterilmeýge keńes berdi. Sondaı-aq, jasóspirimderge qaýipti jerlerde áleýmettik jelilerge arnalǵan beınerolıkter túsirmeýdi eskertti.