Almaty oblysynda toqyma fabrıkasy memleketke 131 mln teńgeden asa zalal keltirgen.
Almaty oblysy boıynsha Sybaılas jemqorlyqqa qarsy qyzmet departamenti oblystyq Ekonomıkalyq tergeý departamentimen birlesip Jambyl aýdanynda ornalasqan iri «maınıng» fermasyn áshkereledi, dep habarlaıdy Almaty-akshamy.kz QazAqparatqa silteme jasap.
«Zańsyz áreketti sheteldik ınvestorlarmen birlese otyryp, burynǵy mata fabrıkasy bolǵan «Qarǵaly» AQ aýmaǵynda júzege asyrǵan. Belgili bolǵandaı, uıymdastyrýshylar «maınıng» fermasyn toqyma óndirisi atynan tutynylatyn elektr qýatynyń qunyn jeńildetilgen tarıf boıynsha tólegen. Tintý kezinde mamandar krıptovalúta óndirý úshin iri shıfrlaý kesheni bar 2800-den astam jabdyq tárkilendi»,- delingen QR Sybaılas jemqorlyqqa qarsy is-qımyl agenttiginiń (Sybaılas jemqorlyqqa qarsy qyzmet) Almaty oblysy boıynsha departamenti jarıalaǵan habarlamada.
Vedomstvonyń aqparatyna sáıkes, aldyn ala baǵalaý boıynsha memleketke 131 198 909 teńge mólsherinde zalal keltirilgen.
«Qazirgi ýaqytta tergeý amaldary júrgizilip, saraptama taǵaıyndaldy. Ózge aqparat tergeý múddesine saı jarıa etilmeıdi»,- dep tolyqtyrdy atalǵan vedomstvonyń baspasóz qyzmetinen.