Bilim bóliminiń ókili suraqqa mardymdy jaýap bere almady.
Almaty oblysynda memleket búdjetine salynǵan mektep qańyrap tur. Qurylysyna qyrýar qarajat ketken ǵımarat qazir, aýyl turǵyndarynyń aıtýynsha, qańǵybastar men nashaqorlardyń mekenine aınalǵan, dep habarlaıdy Almaty-akshamy.kz Almaty.tv-ge silteme jasap.
Áıteı aýylynyń qaq tórinde qańyrap turǵan bul ǵımarat 2008 jyly salynǵan. Mektep retinde paıdalanýǵa berilgen nysannyń alyp jatqan aýmaǵy da az emes. Alaıda memleket qarajatyna boı kótergen bilim ordasynda esiktegi qulyptan basqasynyń bári qırap bitken.
«Obal, árıne. Aqshaǵa salynǵan dúnıe. Ia halyqqa paıdasy tıse eken, bosqa qaraýsyz qaldy. Darbazasy da ańǵal-sańǵal. Mysaly, meniń balalarym mektepke barady. Balalarymdy jalǵyz jiberýge qorqamyn», – dedi Áıteı aýylynyń turǵyny Tamara Ábdiremova.
Eldi meken turǵyndary bul ǵımarat qaraýsyz qalǵaly nashaqorlar men ishimdikke salynǵandardyń ordasyna aınalǵanyn aıtty. Rasynda, burynǵy mekteptiń aýmaǵynda syranyń bos bótelkesi, kıim-keshek pen ózge de zattar jatyr.
Okrýg ákimi jumys babymen ózge jerde júrgenin syltaýratyp, «bárine Qarasaı aýdandyq bilim bólimi jaýapty» dep qutyldy. Mekteptiń ne sebepti bos qalǵanyn bilmeıtin syńaıly. Bilim bóliminiń ókili de bul suraqqa mardymdy jaýap bere almady.
«Eski mekteptiń ǵımaraty «apatty jaǵdaıda» dep tanylmaǵan. Ol týraly bizdiń qolymyzda eshqandaı qujat joq. Endi onymen arnaıy mamandar aınalysady. Jańa mektep salyndy. Álbette, barlyq oqýshy sol jańa mektepke barǵysy keledi. Ol 1200 oryndyq, mektepte 1500 bala syıyp turǵandyqtan, sol mektepke kóshirilgen», – dedi Qarasaı aýdandyq bilim bólimi basshysynyń mindetin atqarýshy Ásel Erkinbaeva.
Ákimdik ókiliniń sózine sensek, buǵan deıin birneshe ret tekseris júrgizgen arnaıy komısıa keleshekte taǵy jumysyn jalǵastyrmaq. Basty maqsat – ǵımarattyń jaramdy ne jaramsyz ekenin anyqtaý.