Almaty oblysynyń polıseıleri kópirden sekirmek bolǵan qyzdy qutqaryp qaldy, dep habarlaıdy Almaty-akshamy.kz Inform.kz-ke silteme jasap.
Oqıǵa Talǵar qalasynda boldy. Tártip saqshylary kópirde turǵan 16 jastaǵy qyzdyń óz-ózine qol jumsamaq bolǵanyn baıqaıdy.
«Patrúldik qyzmettiń aǵa leıtenanttary İlıas Shahızadanov pen Jasulan Myqtybaev, sondaı-aq ÝUI ınspektory serjant Erbol Besbaev jedel áreket etýi arqasynda erekshelendi. Olar qaıǵyly oqıǵanyń aldyn alyp, mektep oqýshysyn kópirden túsirip aldy. Osylaısha sýısıdti boldyrmady», - dedi Almaty oblysy PD bastyǵy Baýyrjan Alenov.
Polısıa qyzmetkerleri kámeletke tolmaǵan balany tynyshtandyryp, birden úıine aparyp, ata-anasyna tapsyrdy. Belgili bolǵandaı, qyzdyń anasy 8 jyl buryn ómirden ótken. Ákesimen jáne aǵasymen birge turady. Sol kúni qyz aǵasymen janjaldasyp, ómirimen qosh aıtyspaq bolǵan.