Almaty oblysynda tártip saqshylary “Anti-fraud” jedel-profılaktıkalyq is-sharasy aıasynda halyq arasynda azamattardyń quqyqtyq saýattylyǵyn arttyrýǵa jáne ınternet-alaıaqtyqtyń aldyn alýǵa baǵyttalǵan túsindirme jumystaryn júrgizdi, dep habarlaıdy Almaty-akshamy.kz Polisia.kz-ke silteme jasap.
Polıseıler halyqqa alaıaqtardyń azamattardyń aqshasy men múlkin urlaý ádisteri týraly túsindirdi. Tártip saqshylary aqparattyq býkletter men kitapshalardy taratý túrindegi dástúrli ádistermen shektelmeı, din salasynyń qyzmetkerin de tartty.
"Internet-alaıaqtardyń aıla-amaldaryna kóbinese aǵa býyn ókilderi túsetini bárine málim. Sondyqtan biz dinı qyzmetkerlerdi tartýdy sheshtik. Bul jalpy azamattar arasynda ǵana emes, qarttar arasynda da aqparattyq-túsindirý jumystarynyń aýqymyn ulǵaıtýǵa múmkindik beredi", – dep atap ótti Almaty oblysy PD KPB bastyǵynyń orynbasary Nurjan Kenesqanuly.
“Anti-fraud” is-sharasy barlyq polısıa bólinisterin tarta otyryp, óńir aýmaǵynda ótti. Almaty oblysyndaǵy sońǵy málimetterge sáıkes jyl basynan beri ınternet-alaıaqtardyń áreketinen 400-ge jýyq adam zardap shekti.
“Anti-fraud” is-sharanyń negizgi soqqy kúshi “Kıberpol” bólinisiniń jedel ýákilderi bolyp tabylady. Olardyń tabandylyǵynyń arqasynda ınternet-alaıaqtyqtyń birneshe faktileri ashyldy. İs-shara barysynda OLX onlaın-jarnama platformasy arqyly joq taýarlardy satýmen aınalysqan Ázirbaıjan Respýblıkasynyń 28 jastaǵy azamaty ustaldy. Sonymen qatar, onlaın-nesıe rásimdep, alaıaqtyqpen aınalysqan áıel adam anyqtaldy. Qazirgi ýaqytta onyń osyndaı 10 faktige qatysy bar ekendigi dáleldendi", – dep qosty N. Keńesqanuly.
Profılaktıkalyq is-sharanyń ótý barysynda polısıa qyzmetkerleri taǵy birneshe kúdiktini anyqtap, ustaı aldy. Barlyq ustalǵandar basqa da osyndaı qylmystarǵa qatysy bar-joǵyna muqıat tekseriledi. Jedel profılaktıkalyq is-shara qorytyndysy boıynsha polıseıler ınternet-paıdalanýshylarǵa qatysty alaıaqtyqtyń 17 faktisin ashty, onyń ishinde buryn jasalǵan 14 qylmys jáne kontrafaktilik ónimdi satýdyń 3 faktisi ashyldy.