Kámeletke tolmaǵan úsh bala jaraqat alǵan.
Almaty oblysynda eki kólik soqtyǵysyp, bes adam qaza taýyp, úsh kámeletke tolmaǵan bala zardap shekti, dep habarlaıdy Almaty-akshamy.kz Sputnik.kz-ke silteme jasap.
Áleýmettik jelide Almaty – Shonjy tasjolynda jantúrshigerlik jol apaty bolǵan jerde túsirilgen vıdeo tarap ketti. Jazba avtorynyń aıtýynsha, apat kólikterdiń betpe-bet soqtyǵysýy saldarynan bolǵan.
Almaty oblystyq polısıasynyń málimetinshe, 6 tamyz kúni keshki saǵat 20:40 shamasynda Eńbekshiqazaq aýdanynda Audi jáne Renault kólikteri soqtyǵysqan. Audi kóliginiń 22 jastaǵy júrgizýshisi Almaty – Kókpek – Kóktal avtojolymen shyǵys baǵytta kele jatyp, róldi basqara almaı, joldyń qarsy betine shyǵyp ketken.
«Oqıǵa ornynda bes adam qaza tapty. Túrli dene jaraqatymen úsh kámeletke tolmaǵan bala Shelek aýylyndaǵy aýrýhanaǵa jatqyzyldy. Osy fakti boıynsha Eńbekshiqazaq aýdandyq polısıa bólimi Qazaqstan Qylmystyq kodeksiniń 345-baby 4-bóligimen qylmystyq is qozǵap, barlyq qajetti saraptamany taǵaıyndady», - dep habarlady oblystyq polısıanyń baspasóz qyzmeti.