43 jastaǵy pasıent bógde zatty ádeıi jutqanyn moıyndady.
Qonaev qalasynyń qalalyq kópbeıindi aýrýhanasynda hırýrg dárigerler 43 jastaǵy er adamnyń asqazanynan as qasyq alyp shyqty, dep habarlaıdy Almaty-akshamy.kz DSM baspasóz qyzmetine silteme jasap.
Hırýrg dáriger Tahır Zakıruly Shúkirálıevtiń aıtýynsha, mundaı jaǵdaılarda dıagnostıka rentgenografıalyq qaraýǵa, endoskopıalyq zertteýge negizdeledi.
Emdeý kezinde kútý tásili qoldanylýy múmkin, biraq bul jaǵdaıda bógde zat endoskopıalyq jolmen alynyp tastaldy.
«Ýaqtyly dıagnoz qoıylmaǵan jaǵdaıda qabyný prosesi, bógde zattyń aınalasyndaǵy ınfıltrat, onyń irińdeýi, jyljýy, sondaı-aq ishektiń bitelýi nemese perıtonıti bar perforasıa paıda bolýy múmkin. Bunyń sońy ólimge ákelýi yqtımal», - deıdi Tahır Zakıruly.
Búgingi kúni pasıent ózin jaqsy sezinedi jáne bógde zatty ádeıi jutqanyn moıyndady.