Jurt úıdegi bala-shaǵasy úshin alańdap otyr
Almaty oblysynyń Kemertoǵan aýylynda bir kúnde 5 úıge ury túsip, baǵaly buıymdar men aqshany qoldy etken. dep habarlaıdy Almaty-akshamy.kz Almaty.tv-ge silteme jasap.
Baqylaýdyń joqtyǵynan, tártiptiń qadaǵalanbaýynan Kemertoǵanda ury-qary kóbeıdi degen kópshilik jaǵdaıdyń alańdatatynyn aıtyp shaǵymdandy. Óıtkeni tapa-tal túste bir kóshedegi 5 birdeı úı tonalǵan. Endi jurt úıdegi bala-shaǵasy úshin qorqyp otyr.
«Tapa-tal túste ury ne úshin túsedi? Saǵat 10:00-11:00- de bári sabylyp jumysqa ketedi. Úıde áıeli men bala-shaǵa bolady. Olar úıdi qorǵaımyn dep júgirip júrgende, óltirip, pyshaqtap ketse she?», – dedi Kemertoǵan aýylynyń turǵyny Jańylaı Áripbaeva.
Ýaıymǵa salynǵan qalyń kópshilik aýyldaǵy tártipsizdikti ýchaskelik polıseılerdiń jetispeýshiligimen baılanystyryp otyr. Turǵyndardyń aıtýynsha, polıseıler baqylaýdy kúsheıtse, olqylyq bolmas edi.
«Aptasyna bir ret profılaktıka júrgizip turýy kerek qoı. Júrgen adamdy «kimsiń? qaıda barasyń?» dep suraý kerek toqtatyp. Keshke jaqyn jınalyp, jigitter ózimiz bolyp arasynda qarap qoıamyz», – dedi Kemertoǵan aýylynyń turǵyny Bıgeldi Tápelov.
Al kúni keshe úıi tonalyp, aqshasy men baǵaly buıymdary urlanǵan aýyl turǵyny tańnan keshe deıin jumysta júretinin aıtady. Onyń tirnektep jıyp, tyǵyp qoıǵan qundy zattaryn túk qoımaı alyp ketken.
«Polısıa qyzmetkerlerine telefon shalǵan edik, saǵat 22:00-da áreń keldi. Sóıtip, krımınalıser kelip, saýsaq izderin alyp ketti. Kelesi kóshede tórt úıge túsken. Shýbasyn, aqshasyn alyp ketken», – dedi Kemertoǵan aýylynyń turǵyny Murat Myńjasarov.
Al Qarasaı aýdanynyń quzyrly organ ókilderi bul iske qatysty tıisti sharýa atqarylyp jatqanyn aıtty. Olardyń aıtýynsha, buǵan deıin de urlyqqa barǵan kúdiktilerdiń qolyna kisen taǵylǵan.
«Almaty oblystyq Qarasaı aýdandyq polısıa basqarmasynda MTF, Jańaqurylys eldi mekeninde urlyq tirkelgen. Osy atalǵan fakti boıynsha qylmystyq is qozǵalyp, qazir tergep tekserý jumysy júrgizilip otyr. Atalǵan aýyldyq aýmaqta qazir 11 ýchaskelik polısıa ınspektory qyzmet atqarady jáne bir jedel ýákil bar. Úlken aýyldy qamtý úshin qyzmetkerler jetispeıdi», – dedi Qarasaı APB bastyǵynyń orynbasary Ertis Toqtarov.
«Bizde osy aýylǵa bólingen 10 ýchaskelik polısıa qyzmetkeri bar. Biraq bizdiń halyq sany sońǵy sanaq boıynsha 50-60 myńǵa jetip qaldy. Onyń aldynda sizder bilmeısizder ǵoı qandaı jumystar jasalǵanyn», – dedi İrgeli aýyldyq okrýginiń ákimi Abylaı Ysqaqov.
Dúıim eldiń tynyshtyǵyn saqtaý úshin Qarasaı aýdandyq polısıa basqarmasy qosymsha qyzmetker jumyldyramyz dep sendirdi. Ol úshin tıisti tapsyrma berilgenin de tilge tıek etti.