Almaty oblysy Qarasaı aýdany Qyrǵaýyldy aýylynyń turǵyndary maldyń óleksesin qorasynan shyǵarmaı otyrǵan úı ıesine shaǵymdandy.
Áleýmettik jelide taraǵan beınejazbadan úlken ashyq qorada jylqy, shoshqa maldary aralas jatqanyn kórýge bolady. Munda ólekselerden bólek, balshyqqa batyp, áreń qozǵalyp jatqan úı janýarlaryn kóresiz, dep habarlaıdy almaty-akshamy.kz.
«Qyrǵaýyldy aýylynda sumdyq jaǵdaı. Jylqylar men shoshqalar ólekseniń janynda ustap otyr. Kóp jyldan beri osy másele sheshilmeı keledi. Dálirek aıtqanda, biz ol týraly búgin ǵana bildik. Biz jaǵymsyz ıis bul jer las bolǵandyqtan shyǵady dep oıladyq. Alaıda ol ólekseniń ıisi eken. Osyǵan shara qoldanýyn suraımyz», - delingen jazbada.
Atalǵan jaǵdaıǵa qatysty Almaty oblysynyń ákimdigi túsinik berdi.
«Kóshe turǵyndarynyń aryz-shaǵymdary boıynsha Qarasaı aýday ákiminiń orynbasary mal ıesimen áńgimelesti. Nátıjesinde shoshqa men jylqy satý týraly kelisimge qol jetkizildi. 4 mamyrdan bastap Oktava baspanasyna tirkelmegen 26 shoshqany ýaqytsha ornalastyrý týraly kelisim jasaldy. Baspanada veterınarlyq saraptama jáne janýarlar karantıni júrgiziledi, jylqylar tasymaldanady. Jaǵdaı aýyldyq okrýg ákiminiń, polısıa men veterınarlyq pýnktiń baqylaýynda. Aýdan ákimdigi tarapynan kólik máselesi sheshildi», – dep atap ótti Almaty oblysynyń ákimdiginen.
Janýarlardyń ıesi - Qyrǵaýyldy aýylynyń turǵyny Alekseı esimdi azamat.
«Bul otbasy osyndaı jaǵdaıǵa qatysty 2022 jyly aıyppul arqalaǵan. 2023 jyly 10 bas janýardy veterınarlyq stansıaǵa tirketken. Búgingi jaǵdaı bizdiń mekemeniń baqylaýynda. Qorada mehanıkalyq jáne birneshe dızenfeksıalyq tazartýlar júrgiziledi», – dep málimdedi Qarasaı aýdandyq vetstansıanyń ókili.
Al Raıymbek aýyldyq okrýginiń ákimdigi janýarlardyń ıesi sanıtarlyq talapqa baǵynbaı kele jatqanyna 10 jyldan asqanyn aıtty. Arasynda aıyppul tólegen. Aýyldastarynyń shaǵymdanýy birinshi ret emes.