Endigi maqsat – toptasqan jobalardy júıeli júzege asyrý.
Almaty oblysynda tuńǵysh ret «Assambleıa jastarynyń» respýblıkalyq sleti ótti, dep habarlaıdy Almaty-akshamy.kz Almaty.tv silteme jasap.
Elimizdiń ár aımaǵynan jınalǵan belsendiler óńirdiń kórikti mekenderin aralap, Jańa Qazaqstandy qurý jolynda oılaryn ortaǵa saldy. Úsh kúnge sozylǵan «Assamlbeıa jastarynyń» respýblıkalyq sleti Qonaev qalasynda qorytyndylandy. Májilis depýtattary men oblys basshylyǵy jastardyń el damýyn aıqyndaıtyn usynys tilekterin tyńdady. Biri kreatıvti ıdeıalar platformasy jobasyn usynsa, endi biri jastardyń kóshbasshylyq qabiletin shyńdaý kerektigin aıtady. Endigi maqsat – toptasqan jobalardy júıeli júzege asyrý.
«Respýblıkalyq chelendjdi usyndyq. «Óz kórikti jerińdi kórset» jáne «Mentorlyq» boıynsha jobany usyndyq. Jańa jobalar, jańa ıdeıalar boıynsha platformasyn usyndyq. Eger de qoldaý tapsa, Jańa Qazaqstanda biraz joba iske asyrylatyn bolady», – dedi «Assambleıa jastarynyń» Almaty oblysyndaǵy tóraǵasy Rýfına Ýsanova.
Elimizdiń túrli óńirinen kelgen belsendi jastar Jetisýdiń kórikti jerlerin aralady. Almaty oblysy - tumsa tabıǵattyń ólkesi. Kólsaı men Qaıyńdy kólderi, Sharyn shatqaly sekildi mekenderge arnaıy saıahattady.
«Halyq assambleıasynyń negizgi taǵy bir paıdasy búkil Qazaqstan boıynsha jańa dos tabýǵa bolady, jańa tanys tabýǵa bolady. Belesterdi baǵyndyrýǵa biz áli de senemiz jáne Jańa Qazaqstandy damytýǵa óz úlesimizdi qosamyz»,– dedi «Assambleıa jastarynyń» Almaty oblysyndaǵy múshesi Danel Jarabaeva.
«Assambleıa jastary» eriktiler uıymy 2018 jyly Prezıdent bastamasymen qurylǵan edi. Búginde oǵan respýblıka boıynsha 6 myńnan astam stýdent tirkelgen.
«Assambleıa jastary ózge ult ókilderimen ǵana jumys isteıdi degen túsinik bar. Al negizi baǵyty – eldegi jastar saıasatynyń oń ımıjin qalyptastyrý. Tyńǵylyqty ıdeıalardy iske asyrý baǵyty boıynsha úlesterin qosyp kele jatyr», – dedi «Assambleıa jastarynyń» Qyzylorda oblysyndaǵy múshesi Aıbek Daırabaı.
Elimizdiń ár aımaǵynan jınalǵan eriktiler jınalysty ádettegideı ǵımaratta, resmı túrde emes, ashyq aspan astynda, sý jaǵasynda ótkizýdi uıǵarǵan. Erkin formatta uıymdastyrylǵan sharaǵa ár qatysýshy óziniń usynys tilekterin bólisti. Aıta keteıik, bul – Assambleıa jastarynyń respýblıkalyq deńgeıde ótkizilip otyrǵan alǵashqy sharasy. Elimizdiń ár aımaǵynan jınalǵan jastar aldaǵy ýaqytta mundaı basqosý ótkizýdi dástúrge aınaldyrmaq nıette.