Ákeler keńesi keıbir jaýapsyz ákelerdiń alıment tólemeýi, az qamtylǵan otbasylarǵa kómek kórsetý, qıyndyqqa tap bolǵan ákeler máselesin sheshýge basa nazar aýdaratyn bolady.
Almaty oblysynda tuńǵysh ret ákeler keńesi quryldy, - dep habarlaıdy Almaty-akshamy.kz
Bul týraly habarlaǵan QazAqparattyń aqparatyna sáıkes, Almaty oblysynyń jastar saıasaty máseleleri basqarmasy, oblystyq jastar resýrstyq ortalyǵynyń uıymdastyrýymen jas urpaqty tárbıeleý isindegi ákelerdiń mártebesi jáne jaýapkershiligin joǵarylatý, otbasylyq qundylyqtardy damytý jáne nyǵaıtý maqsatynda «Áke – otbasynyń tiregi» atty oblystyq ákeler forýmy ótti.
Jıynǵa otbasynda, bala tárbıesinde óz jaýapkershiligin sezingen belsendi ári túrli sala qyzmetterinde úlgi kórsetip júrgen, urpaǵyna sanaly tárbıe berip, kópke úlgi bolyp otyrǵan, kópbalaly ákelermen qatar, jas ákeler de qatysty. Forým aıasynda olar túrli trenıńterge qatysyp, ózara tájirıbe almasty. Búginde otbasy tárbıesindegi, balalardyń boıyna patrıottyq sezimdi darytyp, adamgershilik qundylyqtardy qalyptastyrýdaǵy áke rólin kóterý máselelerine qoǵam nazaryn aýdarý qajet. Osy oraıda, forýmda belsendi ákelerdiń basy qosylyp, aldyńǵy býynnyń ońdy tárbıesin, ata-analar qaýymdastyǵynyń jumysyn jetildirýdegi ózekti suraqtardy talqylaý syndy birqatar máselelerge toqtaldy.
Sonymen qatar, jınalǵan qaýymnyń ortaq usynysyna sáıkes, tuńǵysh ret oblystyq Ákeler keńesi quryldy. Atalmysh Ákeler keńesi ákelik ınstıtýtty nasıhattaýmen qatar, óńirde keıbir jaýapsyz ákelerdiń alıment tólemeýi, az qamtylǵan otbasylarǵa mekenjaılyq kómek kórsetý, onyń ishinde áleýmettik turǵyda qajyǵan, otbasyn asyraýda qıyndyqqa tap bolǵan ákeler máselesin sheshýge basa nazar aýdaratyn bolady.
Ákeler keńesiniń ókilderin jergilikti atqarýshy organdarynyń janyndaǵy ártúrli saraptamalyq jumys toptaryna tartylýy mańyzdy. Arqalar júgi salmaqty keńestiń tóraǵasy retinde Almaty oblystyq bilim jáne ǵylym qyzmetkerleriniń kásipodaq uıymynyń tóraǵasy Tólepbergenov Mels Qulmuhanuly saılandy.