2 qyrkúıek kúni metroǵa 117 myń jolaýshy mingen, dep habarlaıdy aqshamnews.kz
Almatyda metroǵa minetin jolaýshy aǵyny boıynsha rekord ornatyldy, bir táýlikte jer asty kóliginiń qyzmetin 117 myń adam paıdalandy. Bul kórsetkish – metropolıtenniń tarıhyndaǵy eń joǵary deńgeı.
«2 qyrkúıek kúni metro arqyly 117 myń jolaýshy tasymaldandy. Bul táýliktik kórsetkish metropolıten tarıhyndaǵy eń joǵarǵy kórsetkish bolyp esepteledi», – dep jazylǵan Almaty metrosynyń resmı Instagram paraqshasynda.
Metro qyzmetkerleri jolaýshylar sanynyń ósýin jańa oqý jylynyń bastalýymen túsindirdi – qyrkúıekte qalada mektep oqýshylary men stýdentterdiń qozǵalysy kúrt kóbeıgen.
Qazir Almaty metrosynda «Raıymbek batyr», «Jibek joly», «Almaly», «Abaı», «Baıqońyr», «Muhtar Áýezov atyndaǵy teatr», «Alataý», «Saıran», «Máskeý», «Saryarqa» jáne «Baýyrjan Momyshuly» sıaqty 11 stansıa jumys isteıdi.