Memleket basshysy Qasym-Jomart Toqaevtyń Qytaı Halyq Respýblıkasyna resmı sapary aıasynda Ál-Farabı atyndaǵy Qazaq ulttyq ýnıversıteti bazasynda «Sıfrlyq tehnologıalar jáne robototehnıka» halyqaralyq ınstıtýty men robototehnıka ortalyǵyn ashý rásimi ótti.
Bul mańyzdy kelisim Ál-Farabı atyndaǵy QazUÝ men Qytaıdyń jetekshi joǵary tehnologıalyq kompanıasy – Jiangsu Huibo Robotics Technology Co., Ltd. arasyndaǵy strategıalyq áriptestiktiń nátıjesi bolyp tabylady, dep habarlaıdy aqshamnews.kz.
Rásim Qazaqstan Prezıdenti Qasym-Jomart Toqaevtyń Beıjińdegi Qazaqstan-Qytaı iskerlik keńesiniń otyrysy aıasynda ótti.
Aıtýly shara barysynda ashylý rásimine Ál-Farabı atyndaǵy QazUÝ Basqarma Tóraǵasy – Rektor Janseıit Túımebaev pen Jiangsu Huibo Robotics Technology Co., Ltd. (Qytaı) kompanıasynyń ókili Lı Ven (Li Wen) hanym qatysty.
Taraptar ortaq yntymaqtastyqty odan ári tereńdetýge jáne ǵylym men bilim salasyndaǵy ózara tıimdi jobalardy birlesip júzege asyrýǵa nıetti ekendikterin rastady. Sonymen qatar bul ortalyq bolashaqta bilim, zertteý jáne ınovasıa salasynda iri klasterge aınalady degen senim bildirdi.
Saltanatty bólim barysynda Instıtýt pen Robototehnıka ortalyǵy týraly arnaıy beınerolık kórsetildi. Ortalyq KazNU Hub aýmaǵynda ornalasqan jáne jalpy aýdany 600 sharshy metrdi quraıdy. Jobaǵa salynǵan ınvestısıa kólemi – 2 500 000 AQSH dollary. Qazirgi tańda ortalyqta 13 zamanaýı robot ornatylǵan.
Instıtýtta bakalavrıat, magıstratýra jáne doktorantýra deńgeılerinde «Robototehnıka», «Mehatronıka», «Jasandy ıntellekt» jáne «Zattar ınterneti» (IoT) baǵyttary boıynsha birlesken bilim berý baǵdarlamalaryn ázirleý jáne júzege asyrý josparlanýda.
Sondaı-aq ǵylymı-zertteý jumysy da negizgi basymdyqtardyń biri bolmaq. Mamandar óndiristik, servıstik jáne bilim berý robottary salalarynda zertteýler júrgizip, óndiristi avtomattandyrý men aqyldy basqarý júıelerin jasaýǵa úles qospaq. Budan bólek, joba aıasynda startaptar men ınovasıalyq kompanıalar qurylady.
Bul bastama Qazaqstannyń sıfrlyq damý jolyndaǵy mańyzdy qadamyna aınalyp, eldiń halyqaralyq ınovasıalyq keńistiktegi ornyn nyǵaıtýǵa serpin bermek.