Qazaqstan halqynyń tilderi kúnine oraı 2 qyrkúıekte Túrkistan qalasynda erekshe mazmundaǵy baıqaý ótti. Ǵylym jáne joǵary bilim mınıstrliginiń Til saıasaty komıteti uıymdastyrǵan respýblıkalyq «Til sheberi – 2025» baıqaýy bıyl da el ishindegi úzdik til meńgergen memlekettik qyzmetshilerdi anyqtady.
Úsh tildi erkin meńgergen qyzmetkerler arasyndaǵy bul baıqaýǵa elimizdiń ár óńirinen iriktelip alynǵan 15 qatysýshy jınaldy. Olar qazaq, orys jáne aǵylshyn tilderindegi bilim-bilik deńgeılerin jan-jaqty kórsetip, ózara baq synasty.
Baıqaý úsh kezeńnen turdy. Alǵashqy kezeńde úmitkerler qazaq tilindegi sırek qoldanylatyn sózderdiń maǵynasyn ashyp, baı tildik qorlaryn tanytty. Ekinshi kezeńde orys tilinde elimizdiń geografıasy men ulttyq qundylyqtary jaıly suraqtarǵa jaýap berse, sońǵy kezeńde aǵylshyn tilinde Qazaqstannyń tanymal tulǵalary men salt-dástúrleri týraly óz kózqarastaryn ortaǵa saldy.
Til mamandary men ártúrli salanyń kásibı sarapshylarynan quralǵan ádilqazylar alqasy qatysýshylardyń tildik quzyretin, sóıleý mádenıetin, oı júıeleý qabiletin jáne sheshendik sheberligin baǵalady.
Nátıjesinde, baıqaýdyń bas júldesin Almaty qalasy ákimi apparaty tilderdi damytý jáne onomastıka bóliminiń bas ınspektory Nurǵazy Ardaq Ádilǵazyqyzy jeńip aldy.
Ekinshi oryn Qyzylorda oblysy Din isteri basqarmasynyń bólim basshysy Berdibek Nurhatqa buıyrdy. Al úshinshi oryndy Qostanaı oblysy Tekserý komısıasynyń bas ınspektory Jaqsan Raýan men Oral qalasy Zachagan kenti ákimi apparatynyń bas mamany Muhanbetqalıev Dáýletjan bólisti.
Bul baıqaý – memlekettik tildiń mártebesin arttyrýmen qatar, kóptildilik mádenıetin damytýǵa baǵyttalǵan ıgi bastama. Sonymen birge, túrli salada eńbek etip júrgen memlekettik qyzmetshilerdiń jan-jaqty bilimdi, tilge degen súıispenshiligi bar ekenin aıqyndady.
Til – ulttyń jany. Al ony qadirleı bilgen azamat – eldiń shyn janashyry. Osyndaı baıqaýlardyń basty maqsaty da – tilge degen qurmetti arttyryp, kóptildi azamattyq qoǵamnyń qalyptasýyna úles qosý.