Qurylǵylar kútý rejıminde jumys isteıdi.
Almaty metrosyndaǵy alǵashqy seısmıkalyq stansıalar maýsym aıynda tolyǵymen paıdalanysqa beriledi, dep habarlaıdy Almaty-akshamy.kz.
«Injenerlik-seısmometrıkalyq qyzmet stansıalaryn ornatýǵa «Qazaq qurylys jáne sáýlet ǵylymı-zertteý jáne jobalaý ınstıtýty» AQ (QazQSǴZI) ǵylymı-tehnıkalyq turǵydan kómek kórsetti»,- delingen Indýstrıa jáne ınfraqurylymdyq damý mınıstrliginiń baspasóz qyzmetiniń habarlamasynda.
Almaty qalasy metropolıteniniń «Baýyrjan Momyshuly» jáne «Sary Arqa» jańa stansıalarynda toǵyz arnaly sıfrly aspapty-ólsheý júıeleri ornatyldy. Atalǵan qurylǵylar shveısarıalyq «GeoSIG» fırmasynyń ónimi.
Bul – Almaty qalasynyń metro júıesinde ornatylǵan alǵashqy seısmıkalyq stansıa. Atalǵan qurylǵylar jer silkinisin aldyn-ala boljaýǵa múmkindik berip, zilzala kezindegi kınematıkalyq parametrlerdiń aspaptyq jazbalaryn alýǵa septigin tıgizbek. Qurylǵydan alynǵan aqparat seısmıkalyq áserdiń naqty qýaty men erekshelikterin eskerýge jáne metropolıtenniń jańa stansıalaryn jobalaýǵa yqpal etedi.
Qurylǵylar kútý rejıminde jumys isteıdi. Onyń iske qosý shegi – 0.05g. Aspapta iske qosý sheginiń bolýy – metropolıtendegi poıyzdar qozǵalysynyń dınamıkalyq áserimen baılanysty.
Stansıalar ótken jyly tehnıkalyq turǵydan iske qosyldy. Bıylǵy jyldyń maýsym aıynda olardy tolyǵymen paıdalaný josparlanyp otyr. Aldaǵy ýaqytta metropolıtendegi qurylysy júrip jatqan taǵy eki bekette osy taqilettes seısmıkalyq stansıalardy ornatý kózdelgen.