Metroda jańa poıyzdar
Endi metropolıtende 15 poıyz jumys isteıtin bolady, dep habarlaıdy Almaty-akshamy.kz
Pandemıaǵa qaramastan, Táýelsizdiktiń 30 jyldyǵynda, Tuńǵysh Prezıdent kúni qarsańynda jáne Almaty metropolıteniniń 10 jyldyǵynda Almaty metropolıteni úshin arnaıy ázirlengen Hyundai Rotem Ońtústik Koreıa kompanıasy shyǵarǵan 8 jańa elektr jyljymaly quram paıdalanýǵa berildi.
«Metropolıten» KMK elektrodepo bastyǵy Jetkergen Arzaevtyń aıtýynsha, jańa quramdar burynǵylarynan zamanaýılyǵymen erekshelenedi. Vagondar ishki jáne syrtqy beınebaqylaý júıesimen jabdyqtalǵan. Sondyqtan mashınıstiń kabınadan vagondardyń ishindegi jáne syrtyndaǵy jaǵdaıdy beınebaqylaý júıesi monıtorynyń kómegimen baqylaý múmkindigi bar.
Jalpy quramnyń uzyndyǵy 77,8 metr bolatyn poıyzdyń eń úlken tehnıkalyq jyldamdyǵy - 90km/saǵ jetedi. Temperatýra rejımi: -35, +40s.
4 vagon quramyndaǵy jolaýshylardyń syıymdylyǵy 940 adamdy quraıdy. Árbir vagon jylytý, jeldetý men aýa baptaý júıesimen, jolaýshylar salonynyń flýoresentti jaryqtandyrýymen jabdyqtalǵan.
«Biz myna poıyzdardy 10 jyl boıy qoldanyp kelemiz. Sol ýaqyt ishinde tehnıkalyq aqaýlar, jumys barysynda kedergiler bolǵan joq. Sol sebepti 2018 jyly 8 jyljymaly quram satyp alýǵa kelisimshartqa qol qoıyldy. Jańa quramdar vagondar arasynda ótpeli ótkelge ıe, bul jolaýshylardyń qaýipsizdigin qamtamasyz etedi, jańa tehnologıalar osy quramdarda engizilgen», - dedi metropolıtenniń bas ınjeneri Nurǵalı Úsenov.
Barlyq vagondar jolaýshylarǵa bir vagonnan ekinshisine qaýipsiz jáne yńǵaıly ótýdi qamtamasyz etetin ashyq tıptegi (aralyq esiktersiz) keń vagonaralyq ótý joldary arqyly biriktirilgen. Energıa tutynýdy únemdeýge múmkindik beretin tetikter de qarastyrylǵan.
Vagondar qaıta jabdyqtaýdy, tehnıkalyq nyǵaıtý men jóndeýsiz bir qalypty 30 jyl qyzmet etý úshin jobalanǵan, arnaıy qurastyrylǵan.
Osydan on jyl buryn, 2011 jylǵy 1 jeltoqsanda Tuńǵysh Prezıdent - Elbasy Nursultan Ábishuly Nazarbaev Qazaqstandaǵy alǵashqy jáne jalǵyz metropolıtendi ashqan bolatyn. Sodan beri metro jumysy bir mınýtqa da toqtaǵan joq.
Metroda jolaýshylar aǵynynyń únemi ósip kele jatqanyn atap ótti. Máselen, eger pandemıaǵa deıin tasymaldanǵan jolaýshylar sany 50-60 myń adamdy qurasa, jańa eki stansıa ashylǵaly jolaýshylar aǵyny 80-90 myń adamdy quraıdy. Eger metro Altyn Orda bazaryna jetse, jolaýshylar aǵyny 160 myń adamǵa deıin artady.